Aqtaýda oblystyq aýrýhanada jyl basynda bolǵan 13 jasar balanyń qaıtys bolýyna qatysty medısınalyq mekemeniń hırýrgi ustaldy, dep habarlaıdy infohub.kz saıty.
Mańǵystaý oblysy polısıa departamentiniń málimetinshe, 1 qazanda oblystyq balalar aýrýhanasynyń hırýrgi Qazaqstan Qylmystyq is júrgizý kodeksiniń 128-babyna sáıkes ustaldy. Ol ýaqytsha ustaý ızolátoryna qamaldy.
Tergeý barysynda oblystyq balalar aýrýhanasynda balaǵa medısınalyq kómek kórsetý kezinde uıymdastyrý-taktıkalyq jáne emdeý-dıagnostıkalyq sıpattaǵy kemshilikterge jol berilgeni anyqtaldy.
Kámeletke tolmaǵan balanyń jaǵdaıy nasharlaǵan soń ony sanıtarlyq avıasıamen Aqtaýdan Almatyǵa jetkizgen. Alaıda keıin bala qaıtys boldy.
«Qylmystyq is aıasynda qajetti tergeý áreketteri júrgizilip, medısına qyzmetkerleri jaýapqa tartyldy, komısıalyq sot-medısınalyq saraptamalar taǵaıyndaldy. Komısıalyq sot-medısınalyq saraptama qorytyndysyna sáıkes, kámeletke tolmaǵan balaǵa medısınalyq kómek kórsetý kezinde asqynýlardyń damýyna yqpal etýi múmkin kemshilikter anyqtaldy», — dedi polısıada.
Vedomstvonyń habarlaýynsha, qazirgi tańda sotqa deıingi tergeý jalǵasýda. Bolǵan oqıǵanyń barlyq mán-jaıyn anyqtaýǵa baǵyttalǵan tergeý sharalarynyń kesheni júrgizilýde. Tergeý múddesi úshin ózge aqparat jarıa etilmeıdi.
Eske salaıyq, buǵan deıin Aqtaý turǵyny Juldyz Azanova dárigerlik qatelik týraly málimdep, onyń saldarynan 13 jasar uly aýyr jaǵdaıǵa túsip, keıin qaıtys bolǵanyn aıtqan bolatyn. Áıel Qazaqstan Prezıdentine júgingen. Onyń aıtýynsha, bári 17 qańtarda ulynyń ishi kenetten aýyra bastaǵanynan bastalǵan.
Sáýirde Densaýlyq saqtaý mınıstrligi balanyń aýrýhanada qaıtys bolýynan keıin Mańǵystaý oblysynyń aýrýhanasy men emhanasynda jospardan tys tekserýler júrgizilip, birqatar buzýshylyqtar anyqtalǵanyn málimdedi.
Tamyzda Qazaqstan Respýblıkasynyń Densaýlyq saqtaý mınıstri Aqmaral Álnazarova Mańǵystaýdaǵy 13 jasar balanyń qaıtys bolýyna qatysty pikir bildirdi. Mınıstr jasóspirimniń anasymen kezdesetinin ýáde etti.