Kaspı teńizindegi oqý-jattyǵý kezinde aman qalǵan áskerı qyzmetshilerdiń biri Mańǵystaý oblystyq kópbeıindi aýrýhanasynda jatyr. Oǵan qajetti medısınalyq kómektiń barlyǵy kórsetilýde, dep habarlaıdy infohub.kz saıty.
Mańǵystaý oblystyq densaýlyq saqtaý basqarmasynyń málimetinshe, naýqas dárigerlerdiń turaqty baqylaýynda. «Naýqas dárigerlerdiń turaqty baqylaýynda. Oǵan qajetti medısınalyq kómek tolyq kólemde kórsetilýde. Áskerı qyzmetshiniń jaǵdaıy qazirgi tańda turaqty aýyr dep baǵalanýda», — delingen habarlamada.
Mamandar qajetti emdeýdi jalǵastyryp, naýqastyń jaǵdaıyn baqylaýda ustaýda. Ahýal Mańǵystaý oblystyq densaýlyq saqtaý basqarmasynyń baqylaýynda.
Eske salaıyq, 24 qyrkúıekte Mańǵystaý oblysynda QR Qarýly kúshteri Áskerı-teńiz kúshteriniń oqý-jattyǵýy barysynda Kaspı teńizi jaǵalaýynda oqý-jaýyngerlik mindetti oryndaý kezinde aýa raıynyń kúrt nasharlaýy men jeldiń kúsheıýine baılanysty áskerı qyzmetshilerdi teńizge aǵyzyp áketken.
Qorǵanys mınıstrliginiń aldyn ala málimetinshe, teńizge 19 áskerı qyzmetshi aǵyzylyp ketken. Qazirgi ýaqytta 9 áskerı qyzmetshiniń qaza tapqany tirkeldi.
Bas prokýratýra Aqtaý garnızonyndaǵy oqý-jattyǵý kezinde áskerı qyzmetshilerdiń qaza tabýy faktisi boıynsha qylmystyq is qozǵalyp, tergelip jatqanyn habarlady. Aqtaýlyq bloger Azamat Sarsenbaev Mańǵystaý oblysyndaǵy tótenshe jaǵdaı ornynan vıdeo jarıalady.
Áskerı qyzmetshiler qaza tapqannan keıin úkimettik komısıa qurylyp, oqıǵa ornyna premer-mınıstrdiń orynbasary Qanat Bozymbaev jiberildi. Prezıdent Qasym-Jomart Toqaev Mańǵystaý oblysynda áskerı qyzmetshilerdiń qaza tabýyna baılanysty kóńil aıtyp, tragedıany tergeý jóninde tapsyrmalar berdi.
Aqtaýda qala kúnine oraı merekelik sharalar toqtatyldy. Prezıdent Qasym-Jomart Toqaev 25 qyrkúıekti Qazaqstanda jalpyulttyq aza tutý kúni dep jarıalady.
24 qyrkúıek keshinde premer-mınıstrdiń orynbasary Qanat Bozymbaevtyń basshylyǵymen komısıa Mańǵystaý oblysyna keldi.