Kaspı teńizindegi áskerı oqý-jattyǵý kezinde qaza tapqan sarbazdardyń týystary Aqtaýdaǵy qalalyq máıithananyń aldyna jınaldy, biraq uldaryn óz kózderimen kóre almady. Keıbireýleriniń áskerı qyzmetten bosaýyna sanaýly kún qalǵan edi. Bul týraly qaza tapqan áskerı qyzmetshilerdiń biriniń ákesi aıtty, dep habarlaıdy infohub.kz saıty.
«Úıime osy jańalyqpen keldi. Ákimdikten, ýchaskelik polıseı keldi. «Keshirińiz, sizdiń ulyńyz aty-jóni osy ma? Ol máıithanada», – dedi. Biraq men bul meniń ulym ba, joq pa, áli bilmeımin. Eshkim eshqandaı aqparat bermeıdi, eshkim shyqpaıdy!» – dedi jýrnalıserge resmı tizim jarıalanǵanǵa deıin qaza tapqandardyń biriniń ákesi Júsip Orazalı.
Osy qaıǵyly oqıǵaǵa baılanysty qazaqstandyqtar 11 jyl buryn Kaspıde bolǵan tótenshe jaǵdaıdy eske alýda. Sol kezde de oqý-jattyǵý barysynda teńiz desantyn túsirý kezinde alty BTR teńizge shyqqan. «Olardy tolqyn qaptap, tek eki mashına ǵana jaǵaǵa shyǵa aldy. Qalǵandary áskerı qyzmetshilermen birge sýǵa ketti. Sonda tórt adam qaza tapty. Qyzmetke nemquraıly qaraýǵa kináli dep alty komandır tanyldy. Olar bir jarymnan eki jylǵa deıin kolonıa-poselenıede jáne shartty túrde jaza aldy», – delingen KTK telearnasynyń sújetinde.
Eske salaıyq, 24 qyrkúıekte Mańǵystaý oblysynda Qazaqstan Respýblıkasy Qarýly Kúshteriniń Áskerı-teńiz kúshteriniń oqý-jattyǵýy kezinde Kaspı teńiziniń jaǵalaýynda aýa raıynyń kúrt nasharlaýy men jeldiń kúsheıýine baılanysty áskerı qyzmetshiler teńizge aǵyzylyp ketti.
Alǵashynda teńizge 19 áskerı qyzmetshi aǵyzylyp ketkeni jáne 9 áskerı qyzmetshiniń qaza tapqany birden rastalǵany habarlandy. Bas prokýratýra Aqtaý garnızonynda qylmystyq is qozǵalyp, tergelip jatqanyn málimdedi.
Áskerı qyzmetshiler qaza tapqannan keıin úkimettik komısıa qurylyp, tótenshe jaǵdaı ornyna Premer-mınıstrdiń orynbasary Qanat Bozymbaev jiberildi. Qazaqstan Prezıdenti Qasym-Jomart Toqaev Mańǵystaý oblysyndaǵy áskerı qyzmetshilerdiń qaza tabýyna baılanysty kóńil aıtyp, qaıǵyly oqıǵany tergeý jóninde tapsyrmalar berdi.
Aqtaýda qala kúnine oraı merekelik is-sharalar toqtatyldy. Qasym-Jomart Toqaev 25 qyrkúıekti Qazaqstanda jalpyulttyq aza tutý kúni dep jarıalady. Kóp uzamaı Premer-mınıstrdiń orynbasary Qanat Bozymbaevtyń basshylyǵymen komısıa Mańǵystaý oblysyna keldi. Kaspı teńizindegi oqý-jattyǵý kezinde qaza tapqandardyń týystary máıitterdi sáıkestendirý úshin Aqtaýdaǵy máıithanaǵa keldi.
24 qyrkúıek keshinde naqtylanǵan derekter belgili boldy. Teńizge 17 adam aǵyzylyp ketti, olardyń 12-si qaza tapty, úsheýin qutqarý múmkin boldy. Qalǵan eki áskerı qyzmetshini izdeý jalǵasýda.
Sondaı-aq Qorǵanys mınıstrligi Kaspı teńizindegi oqý-jattyǵý kezinde qaza tapqan áskerı qyzmetshilerdiń tizimin jarıalady. Tizimge 11 matros jáne bir aǵa leıtenant endi.
Sonymen qatar, Qanat Bozymbaev Kaspı teńizindegi qaıǵyly oqıǵaǵa kináli barlyq laýazymdy tulǵalar «áreket nemese áreketsizdik» úshin jazalanatynyn ýáde etti.