Mańǵystaý oblysynda bala ystalǵan balyqtan ýlanyp, jansaqtaý bóliminde jatyr. Dárigerler onyń jaǵdaıyn aýyr dep baǵalap, emdeýdi jalǵastyryp jatyr, dep habarlaıdy infohub.kz saıty.
Bala kópbeıindi balalar aýrýhanasynyń mamandarynyń baqylaýynda. Aýrýhanaǵa túskennen keıin oǵan botýlızmniń aýyr túri jáne ınfeksıalyq-toksıkalyq shok dıagnozy qoıyldy. Jas pasıentke qarsy botýlındik sarysý egildi.
Mamandardyń aıtýynsha, kún saıyn konsılıým ótkizilip, elimizdiń basqa óńirlerindegi dárigerlermen telekonsýltasıalar uıymdastyrylǵan.
«Bala bizge botýlızmniń aýyr túrimen, ınfeksıalyq-toksıkalyq shok kúıinde tústi. Ol es-tússiz jatty, refleksteri joq edi. Ony shuǵyl túrde jansaqtaý bólimine jatqyzyp, ókpeni jasandy jeldetý apparatyna qostyq. Qazirgi tańda bala qajetti emniń barlyǵyn alyp jatyr», — dedi kópbeıindi balalar aýrýhanasy dırektorynyń orynbasary Álıa Ishımova.
Astanadan reanımatolog, ınfeksıonıst jáne nevropatolog shaqyryldy. Ahýal oblys ákiminiń jeke baqylaýynda.
«Bizdiń dárigerler qoldan kelgenniń bárin jasap jatyr. Olar Astanadaǵy mamandarmen onlaın-konsýltasıada. Ata-anasy astanalyq dárigerlerdiń kelip, balany tekserýin surady. Jaqyn arada ınfeksıonıst pen reanımatolog Aqtaýǵa ushyp kelýi tıis. Dárigerler qazirdiń ózinde osynda kele jatyr», — dedi Mańǵystaý oblysynyń ákimi Nurdáýlet Qılybaı.
Buǵan deıin biz Mańǵystaýda otbasylyq dastarqan jansaqtaý bólimimen aıaqtalǵanyn habarlaǵan bolatynbyz.