Aýyr botýlızmmen reanımasıada jatqan 9 jastaǵy balanyń týystary shaǵymdanǵan soń, Mańǵystaý oblysyna Astanadan mamandar jiberildi, dep habarlaıdy infohub.kz saıty.
«Bizdiń dárigerler qoldarynan kelgenniń bárin jasap jatyr, Astanamen onlaın keńesip otyr. Týystary Astanadan dárigerler kelsin degen máseleni kóterdi. Eń jaqyn reıspen ınfeksıonıst pen reanımatolog ushyp keledi», — dedi oblys ákimi Nurdáýlet Qılybaı.
Buǵan deıin Kursiv jazǵandaı, balanyń týystary ákimge jáne oblystyq densaýlyq saqtaý basqarmasynyń basshylyǵyna júgingen. Olar bala tórtinshi kún aýyr halde jatqandyqtan, Aqtaýǵa respýblıkalyq deńgeıdegi dárigerlerdi jiberýdi suraǵan.
«Balaǵa tolyqqandy medısınalyq kómek kórsetý qajet, joǵary bilikti mamandardyń keńesi kerek dep esepteımiz», — delingen ótinishte.
Úsh eresek adam men 9 jastaǵy bala dastarqan basynan keıin aýrýhanaǵa jatqyzylǵan. Ýlanýǵa úı jaǵdaıynda daıyndalǵan sýyq ystalǵan balyq sebep bolýy múmkin.
Barlyq naýqasta aýyr botýlızm belgileri anyqtalyp, olar JÓA apparattaryna qosyldy jáne olarǵa qarsy botýlındik sarysý engizildi.
Naýqastardyń jaǵdaıy áli de aýyr dep baǵalanyp otyr. Bala ınfeksıalyq-toksıkalyq shok kúıinde túsken jáne áli kúnge deıin esin bilmeı jatyr.
Qazir astanalyq mamandar naýqastardy tekserip, jergilikti dárigerlermen birge emdeý taktıkasyn anyqtaýy tıis.
Botýlızm men taǵamdyq ýlanýdan qalaı qorǵanýǵa bolady — Kursiv Health maqalasynan oqyńyz.