Jıyrma tórtinshi qyrkúıekte Mańǵystaý oblysynda, Aqtaýdan 43 shaqyrym jerde, Qazaqstan Respýblıkasy Qarýly Kúshteriniń Áskerı-teńiz kúshteri oqý-jattyǵý ótkizip jatqanda qaıǵyly oqıǵa boldy: Kaspı teńizine 19 áskerı qyzmetshini aǵyzyp áketti. Bul týraly Qazaqstan Respýblıkasy Qorǵanys mınıstrligine silteme jasap, infohub.kz saıty habarlady.
Qorǵanys vedomstvosynyń túsindirýinshe, áskerıler Kaspı teńiziniń jaǵalaýynda oqý-jaýyngerlik tapsyrmany oryndap jatqan. Sol kezde aýa raıy kúrt nasharlap, jel kúsheıgennen keıin olardy teńizge aǵyzyp áketken.
Aldyn ala derekterge qaraǵanda, teńizde 19 áskerı qyzmetshi bolǵan. Qazirgi tańda olardyń toǵyzynyń qaza tapqany tirkeldi.
Úsh áskerı qutqaryldy, olardyń bireýi aýrýhanaǵa jatqyzyldy. Qalǵandaryn izdeý jalǵasýda. Oqıǵa ornyna qutqarý qyzmetteriniń kúshteri men quraldary dereý jiberildi. İzdeý-qutqarý operasıasyna Áskerı-teńiz kúshteriniń, Tótenshe jaǵdaılar mınıstrliginiń bólimsheleri, avıasıa jáne basqa da tıisti qyzmetter jumyldyryldy.
Oqıǵanyń barlyq mán-jaıyn anyqtaý jáne izdeý-qutqarý jumystaryn úılestirý úshin oqıǵa ornyna Qorǵanys mınıstri, avıasıa general-leıtenanty Dáýren Qosanov bastaǵan Qorǵanys mınıstrliginiń komısıasy shuǵyl attandy.
Qazaqstan Respýblıkasynyń Qorǵanys mınıstrligi qaza tapqan áskerı qyzmetshilerdiń týǵan-týystaryna qaıǵyra kóńil aıtty. Qaza tapqandardyń otbasylaryna qajetti kómek pen qoldaý kórsetiledi.
İzdeý operasıasynyń barysy men áskerı qyzmetshilerdiń jaǵdaıy týraly qosymsha aqparat derekter kelip túsken jáne rastalǵan saıyn berilip otyrady.
Qorǵanys mınıstrligi tek qorǵanys vedomstvosy men basqa da memlekettik organdardyń resmı aqparatyna súıenýge shaqyrdy.