Mańǵystaý oblysynda hırýrgter «menıngoradıkýlosele» dıagnozymen týǵan nárestege alǵash ret asa kúrdeli neırohırýrgıalyq ota jasady. Buǵan deıin óńirde mundaı otalar jasalmaǵan, dep habarlaıdy infohub.kz saıty.
Menıngoradıkýlosele — omyrtqa men júıke júıesiniń damý aqaýyna jatatyn týa bitken julyn jaryǵynyń bir túri.
Densaýlyq saqtaý mınıstrliginiń dereginshe, ota kezinde balaǵa nebári 16 kún bolǵan. Kishkentaı naýqastyń júıke ushtaryn zaqymdamaý úshin dárigerler brıgadasy zamanaýı ıntraoperasıalyq neıromonıtorıng júıesin paıdalandy — ozyq medısınalyq tehnologıalar otanyń sátti ótýinde sheshýshi ról atqardy.
Nárestege kúrdeli otany neırohırýrg Ahmet Oryn, nevropatolog Botagóz Muldasheva, asıstent Erbol Kenjevalov jáne anestezıolog-reanımatolog Amangeldi Dúısenbek jasady.
Ota sátti ótti. Qazir náreste neırohırýrg, nevropatolog, ýrolog jáne ortopedtiń baqylaýynda, jaǵdaıy qanaǵattanarlyq dep baǵalanýda.
Alda balany mindetti ońaltý kútip tur.
Densaýlyq saqtaý mınıstrliginde atalǵan hırýrgıalyq aralasý mynany kórsetetinin atap ótti: endi Mańǵystaýda asa kúrdeli otalardy naýqastardy respýblıkalyq klınıkalarǵa jibermeı, jergilikti jerde jasaýǵa bolady.
Vedomstvoda dárigerlerge sapaly jumysy men joǵary kásibıligi úshin alǵys bildirdi. Ómiriniń alǵashqy kúnderinde osyndaı kúrdeli aralasýdy bastan ótkergen balaǵa densaýlyq pen uzaq ǵumyr tiledi.
Buǵan deıin «Kýrsıv» almatylyq hırýrgter bir aýysymda ondaǵan magnıt jutyp qoıǵan úsh balany qutqarǵanyn jazǵan bolatyn.