Mańǵystaý oblysynda oqý mádenıetin qalyptastyrýǵa jáne jas urpaqtyń rýhanı-tanymdyq áleýetin arttyrýǵa baǵyttalǵan aýqymdy bastama bastaldy. Óńirde oblys ákimdigi men «Kitap oqıtyn ult – Chıtaıýshaıa nasıa» qoǵamdyq qory arasynda yntymaqtastyq týraly memorandýmǵa qol qoıý rásimi ótti, dep habarlaıdy infohub.kz.
Qujatqa Mańǵystaý oblysy ákiminiń orynbasary Abat Úrisbaev pen «Kitap oqıtyn ult – Chıtaıýshaıa nasıa» qoǵamdyq qorynyń tóraǵasy Baqytjan Turlybekov qol qoıdy.
Yntymaqtastyqtyń basty maqsaty – Mańǵystaý oblysynda «Oqıtyn ult» respýblıkalyq marafonyn birlesip iske asyrý, oqý mádenıetin keńinen nasıhattaý, oqyrmandyq orta qalyptastyrý jáne qoǵamnyń ıntellektýaldyq áleýetin arttyrý. Bul bastama memleket basshysynyń oqý mádenıetin damytýǵa, bilimge umtylysty arttyrýǵa jáne bilimdi ult qalyptastyrýǵa baǵyttalǵan jarlyǵyn iske asyrýdyń mańyzdy tetikteriniń birine aınalady.
Kezdesý barysynda oblys ákiminiń orynbasary Abat Úrisbaev «Oqıtyn ult» jobasynyń basty maqsaty – halyq arasynda oqý mádenıetin sińirý, otandyq ádebıetti nasıhattaý jáne ıntellektýaldy ult qalyptastyrýǵa úles qosý ekenin atap ótti.
«Memleket basshysy Qasym-Jomart Kemeluly Toqaev elde oqý mádenıetin qalyptastyrýǵa jáne jas urpaqtyń ıntellektýaldyq áleýetin arttyrýǵa erekshe kóńil bóledi. Óıtkeni básekege qabiletti, shyǵarmashyl jáne jasampaz tulǵa tárbıeleýdiń negizi – bilim men kitap. Osyǵan oraı búgingi bastamanyń maqsaty aıqyn. Qoǵamda, ásirese halyq arasynda oqý mádenıetin keńinen nasıhattaý, otandyq ádebıet pen aǵartýshylyq qundylyqtardy dáripteý qajet. «Oqıtyn ult» jobasyn Mańǵystaý oblysynyń barlyq aýdandary men qalalarynda joǵary deńgeıde iske asyrý josparlanýda», – dedi Abat Úrisbaev.
«Kitap oqıtyn ult – Chıtaıýshaıa nasıa» qoǵamdyq qorynyń tóraǵasy Baqytjan Turlybekov te jobanyń mańyzdylyǵyn atap ótti.
«Dana ult qalyptastyrý – bir kúnniń nemese bir jobanyń isi emes. Bul qoǵamnyń oılaý mádenıetin ózgertetin uzaq merzimdi proses. Biz úshin bul bastamanyń kórnekti jazýshy Ábish Kekilbaev dúnıege kelgen qasıetti topyraqta júzege asýy erekshe mańyzdy. Mańǵystaý oblysymen osy baǵytta nátıjeli jáne mazmundy áriptestik ornaıtynyna senimdimiz», – dedi Baqytjan Turlybekov.
Memorandým aıasynda oqýdy nasıhattaýǵa baǵyttalǵan túrli qoǵamdyq-aǵartýshylyq is-sharalar, oqyrmandyq bastamalar jáne marafonnyń óńirlik kezeńderi uıymdastyrylatyn bolady.
Jobany iske asyrýǵa Qazaqstan Jazýshylar odaǵy, Kreatıvti ındýstrıalardy damytý qory jáne Yandex Qazaqstan kompanıasy Iandeks Kitaptar servısimen birlesip qatysýda. Joba Qazaqstan Respýblıkasy Mádenıet jáne aqparat mınıstrliginiń qoldaýymen júzege asyrylýda.