Fransýz jáne reseılik aktrısa, ánshi ári jazýshy, aqyn Vladımır Vysoskıdiń sońǵy jubaıy Marına Vladı 89 jasynda ómirden ótti. Ártis týraly fransýzdyq BFV TV telearnasy habarlady, dep jazady NUR.KZ «Izvestıa»-ǵa silteme jasap, infohub.kz saıty habarlaıdy.
«Fransýz-orys aktrısasy, ánshi ári jazýshy Marına Vladı osy beısenbide, 24 qyrkúıekte qaıtys boldy. Ol 88 jasta edi», — dep keltiredi basylym telearna habarlamasyn.
Týǵan kezde Ekaterına-Marına Polákova-Baıdarova esimin alǵan Marına Vladı 1938 jyly 10 mamyrda Klıshıde, 1917 jylǵy revolúsıadan keıin Reseıden ketken orys emıgranttarynyń otbasynda dúnıege keldi. Ákesi, opera ánshisi Vladımır Polákov-Baıdarov, Reseıden Birinshi dúnıejúzilik soǵys kezinde ketken. Anasy — orys generalynyń qyzy, balerına Mılısa Envald — 1919 jyly Fransıaǵa emıgrasıalaǵan.
Vladı óz jolyn Parıj operasynyń jas bıshisi retinde bastady, alaıda kóp uzamaı balerına mansabynan bas tartyp, akterlik kásipti tańdady. Laqap atyn ákesi qaıtys bolǵannan keıin aldy. Alǵashqy rólin on jasynda — Jan Gereıdiń «Jazǵy naızaǵaı» (1949) fılminde somdady.
Ol nebári 17 jasynda rejıser Rober Osseınge turmysqa shyǵyp, onyń tórt fılminde tústi. Olar sol kezdegi kınematograftaǵy eń kórnekti juptardyń biri atandy.
1963 jyly aktrısa Kann kınofestıvalinde úzdik áıel róli úshin júlde aldy, onda qazylar alqasy onyń Marko Ferrerıdiń «Jubaılar tósegi» fılmindegi jumysyn atap ótti.
1970-1980 jyldary Marına Vladı aqyn ári bard Vladımır Vysoskımen nekede boldy. Olar 1967 jyly tanysyp, 1970 jyly otbasyn qurdy. Marına úshin Vysoskı úshinshi kúıeýi boldy, neke ánshiniń 1980 jyly qaıtys bolýyna deıin jalǵasty.
Vysoskı qaıtys bolǵannan keıin Vladı tórtinshi ret — onkolog dáriger Leon Shvarsenbergke turmysqa shyqty. Onymen 23 jyl birge ómir súrdi, sońǵy kúıeýi 2003 jyly qaıtys boldy.
Osseınmen birinshi nekesinen onyń eki uly — Igor men Pótr dúnıege keldi.