Tirlik pen densaýlyqta – basta baǵym,
Onan sońǵy dáýletim – til men jaǵym.
Qudaı bergen on eki múshelerim ,
Óz ónerim ózime–altyn taǵym.

Alty alashqa jaıylyp ketken atym,
Júrgen jerim - dý bazar, qylyp hatym.
Ustaz pirdiń húmmaty bolyp járdem,
[Bir] ushsam, kete berem, bar qanatym.

Baıanaýyl: Qyzyltaý- ósken jerim ,
Kirim jýyp, kindigim kesken jerim .
Qalam, sıa, qaǵazdy qolyma alsam,
Keler qorshap boıyma ǵaıyp pirim .

Aıdabol men Kúlikten- shyqqan zatym,
Máshhúr degen– bir laqap, Júsip- atym.
Orta boıly, qoı kózdi, pitir(pitı) murtty,
Aqquba, bıdaı óńdi qıapatym.

Jylym- qoı, toǵyz beske kelip jasym,
Jarastyqty, kórnekti saqal, shashym,
Jel qaıyqtaı jel sózge esýshi edim ,
Turǵan kúnde: “domalap órge tasym!”

Ákem Kópeı- jetpis úsh jasynda ótken,
Din jolyna jas kúnde bizdi úıretken.
Ózi jastaı tarıqat jolyn izdep,
Ábilqasym ıshanǵa qyzmet etken.

Babamyzdyń aty eken- Shermuhammed,
Qudaıǵa - qul, náýıge(nábıge) bolǵan úmbet.
Balalaryn oqýǵa súıreıdi eken,
Eki qoldap jetelep, qylyp húmmet.

---