Reseıdiń alty qalasynyń turǵyndary 25 qyrkúıekten bastap Qazaqstannyń dıplomatıalyq ókildikterine kelip, Kaspı teńizindegi oqý-jattyǵý kezinde qaza tapqan áskerı qyzmetshilerdi eske alýda. Máskeýdegi Qazaqstan Respýblıkasy elshiliginiń ǵımaratyna jáne Sankt-Peterbýrg, Qazan, Omby, Astrahan, Ekaterınbýrgtegi bas konsýldyqtarǵa gúl shoqtary qoıylýda. Kelýshilerdiń arasynda Reseıde turatyn qazaqstandyqtar bar, dep habarlaıdy infohub.kz saıty.
Adamdar qaza tapqandardyń otbasylaryna kóńil aıtyp, zardap shekkenderge tez saýyǵýdy tileýde. Elshiliktiń elektrondyq poshtasyna da kóńil aıtý hattary kelip túsýde.
«Qazaqstannyń Reseıdegi dıplomatıalyq ókildikterinde kóńil aıtý kitaptary ashyldy. Olarǵa Reseı qorǵanys mınıstriniń orynbasary Vasılı Osmakov, Reseı SİM TMD elderi boıynsha úshinshi departamentiniń dırektory Aleksandr Sternık, Eýrazıalyq ekonomıkalyq komısıa alqasynyń tóraǵasy Baqytjan Saǵyntaev jáne TMD Bas hatshysynyń orynbasary Denıs Trefılov jazba qaldyrdy. Kóńil aıtqandardyń qatarynda Reseıdegi Avstralıa elshisi Djon Gırıng, Reseıdegi Belarýs elshisi Iýrı Selıverstov, Omby vıse-meri Elena Dáchýk jáne basqalar bar», — delingen Qazaqstannyń Reseı Federasıasyndaǵy elshiliginiń baspasóz qyzmetiniń habarlamasynda.
Eske salaıyq, 24 qyrkúıekte Mańǵystaý oblysynda oqý-jaýyngerlik tapsyrmany oryndaý barysynda aýa raıy kúrt nasharlap, 17 áskerı qyzmetshi ashyq teńizge aǵyzylyp ketken. Úsheýi qutqarylyp, 14-i qaza tapty. 25 qyrkúıek tańynda sońǵy joǵalǵan ekeýiniń — serjant Mansur Gýmarov pen matros Mıras Turdybekulynyń deneleri tabyldy. Osydan keıin izdeý operasıasy aıaqtaldy.
25 qyrkúıekte el prezıdenti Qasym-Jomart Toqaevtyń ókimimen jalpyulttyq aza tutý kúni jarıalandy. Memleket basshysyna álem elderiniń basshylary men halyqaralyq uıymdar jetekshilerinen kóńil aıtý jedelhattary kelip túsýdi jalǵastyrýda.
Buǵan deıin «Kýrsıv» teńizshilerdiń qaza tabýyna qatysty is boıynsha Qazaqstan Qorǵanys mınıstrliginiń bes ofıseri ustalǵanyn jazǵan bolatyn. Nemquraılylyq pen keme júrgizý erejelerin buzý baptary boıynsha qozǵalǵan qylmystyq is Bas prokýratýranyń erekshe baqylaýynda. Tótenshe jaǵdaıdyń sebepterin anyqtaý úshin Premer-mınıstr orynbasary Qanat Bozymbaev basqarǵan úkimettik komısıa quryldy. Vıse-premer Kaspıdegi oqý-jattyǵý kezinde qaza tapqan teńizshilerdiń otbasylary tıesili barlyq tólemderdi kidirissiz alatynyn ýáde etti.