Massachýsets shtatynda (AQSh) 270-ten astam katolık dinı qyzmetkeri ondaǵan jyldar boıy balalarǵa jynystyq zorlyq-zombylyq jasaǵan. Tergeý derekterine sáıkes, úsh eparhıada myńǵa jýyq bala zardap shekken. Bul týraly shtattyń bas prokýrory Andrea Kempbell jarıalaǵan tergeý esebinde aıtylǵan, dep habarlaıdy infohub.kz saıty.
Esep Fol-Rıver, Sprıngfıld jáne Výster katolık eparhıalaryn qamtıdy. Bul — jarty ǵasyrdan astam ýaqyt boıy jalǵasqan zorlyq-zombylyq pen júıelik buzýshylyqtar týraly alǵashqy tolyq jarıa esep.
Kempbelldiń aıtýynsha, eparhıa basshylyǵy bolyp jatqan jaǵdaıdy jyldar boıy bilgen, biraq «olar balalardy emes, shirkeýdiń bedelin qorǵaýdy jıi tańdaǵan».
«Bul sandardyń árqaısysynyń artynda qaýipsizdigi buzylǵan bala, ómiri máńgilikke ózgergen otbasy jáne osy zorlyq-zombylyqtan jaraqat alyp, onyń saldaryn jyldar, kóp jaǵdaıda ondaǵan jyldar boıy ishinde alyp júrgen adam tur», — dedi Kempbell.
Anyqtalǵan jaǵdaılardyń kópshiligi 2002 jylǵa deıin bolǵan.
Výster eparhıasy tergeý qorytyndylaryn zerdeleıtinin málimdedi. Onyń málimdemesinde esep «burynǵy zorlyq-zombylyq qurbandaryna kómek kórsetý úshin qandaı qosymsha jaqsartýlar engizýge bolatynyn anyqtaý jáne balalardyń qaýipsizdigin qamtamasyz etý jónindegi kúsh-jigerdi odan ári kúsheıtý úshin» qaralatyny aıtylǵan.
Kempbell tergeý nátıjeleri eparhıalar ishinde reformalar men zardap shekkenderdi qoldaý úshin jańa zańdar qajet ekenin kórsetetinin málimdedi. Atap aıtqanda, ol balalyq shaqtaǵy jynystyq zorlyq-zombylyqqa baılanysty azamattyq talaptar boıynsha eskirý merzimin alyp tastaýdy usyndy.
Katolık shirkeýindegi zorlyq-zombylyqqa qatysty aýqymdy janjal 2002 jyly The Boston Globe gazetiniń tergeýinen keıin tutandy. Gazet Boston arhıeparhıasynyń basshylyǵy dinı qyzmetkerlerdiń jynystyq zorlyq-zombylyq jasaý faktilerin júıeli túrde jasyryp kelgenin áshkereledi. Pýlıtser syılyǵyna ıe bolǵan jarıalanymdar basqa elderde tergeýler júrgizýge jáne Massachýsetste birqatar reformalar qabyldaýǵa ákeldi.