Brıtandyq Massive Attack toby Sıngapýrdaǵy konsertinde Palestına týyn kótergeni úshin elge kirýge tyıym salynǵanyn «súrealısik tájirıbe» dep atady. Bul týraly infohub.kz habarlaıdy.
Sársenbide Star Theatre-de ótken konsertte top músheleri án oryndaý kezinde Palestına týyn jaıyp kórsetken. Osyǵan baılanysty olar polısıa tekserýine ushyrap, elden shyǵaryldy. Sıngapýr sheteldik týlardy, eltańbalardy nemese bannerlerdi ruqsatsyz kópshilik aldynda kórsetýge tyıym salatyn qatań zańdarymen tanymal.
Jeksenbide top Instagram-da resmı málimdeme jarıalady. Onda: «29 shildede Sıngapýrdaǵy Star Theatre-de óner kórsetkennen keıin bizdiń búkil toptyń polısıa ustap, oqshaýlap, bólek-bólek suraq qoıǵanyna tań qaldyq jáne renjidik – keıbir múshelerdiń qonaqúı bólmelerin tintýge jáne tólqujattaryn ýaqytsha alyp qoıýǵa deıin bardy», – delingen.
Málimdemede ári qaraı: «Biz sahnaǵa shyqpas buryn jáne shoý sońynda zaldyń úlken bóligi ózdiginen «Free Palestine» dep urandady. Olar bul stıhıalyq árekettiń ózi úkimettiń senzýra zańdaryn buzýy múmkin ekenin bilgen bolýy múmkin, biraq oǵan qaramady. Al biz 157 el moıyndaǵan egemen memlekettiń týyn kóterý qandaı da bir zańdy buzady dep oılamadyq», – delingen.
Top bul tájirıbeni «adam quqyqtary men sóz bostandyǵy qaýip tóngen kezde olardy qorǵaýdyń mańyzdylyǵyn eske salý» dep sıpattady. Olar sondaı-aq Ulybrıtanıada beıbit sherýshilerdiń qoljazba plakattary úshin terorızm zańdary boıynsha tutqyndalǵanyn mysalǵa keltirdi.
Senbide Sıngapýr polısıasy men Infocomm Media Development Authority Del Naja men Marshall-dy «saıası sebepterdi qoldaý jáne shetel týyn jaıǵany úshin» teksergenin málimdedi. Tekserý nátıjesinde ekeýine de «qatań eskertý» jasalyp, Sıngapýrǵa qaıta kirýge tyıym salyndy.
Sıngapýr bıligi «Sıngapýrdaǵy násilaralyq jáne dinaralyq kelisimge zıan keltirýi múmkin áreketterge baıyppen qaraıtynyn» atap ótip, «sheteldik saıasatty ımporttaý bizdiń áleýmettik birligimiz ben zań ústemdigine nuqsan keltirýi múmkin» dep eskertti.