Qazaqstan Parlamenti Senatynyń eks-tóraǵasy Máýlen Áshimbaev aldaǵy josparlary týraly aıtyp berdi, dep habarlaıdy Alash.kz.
Saıasatker memlekettik qyzmetshi áleýeti suranysqa ıe jerde jumys isteýi kerek ekenin atap ótti. «Biz memlekettik qyzmette júrip, áleýetimiz qajet bolatyn baǵytta jumys isteýimiz kerek. "Men ana jaqqa baramyn, myna jaqqa baramyn" degen bolmaıdy. Bul durys emes ustanym. Biz muny jastarǵa da túsindirýimiz kerek», — dedi Áshimbaev.
Ol sondaı-aq: «Quryltaıǵa, Halyq keńesine jańa adamdar keledi dep senemin. Barlyq ózgerister jaqsylyqqa aparsyn. Ómir boıy depýtat bolý sharty joq. Jalpy memlekettik qyzmet – ýaqytsha dúnıe. Memlekettik qyzmetke kelý jáne odan durys ketý bar. Keıde kelýden góri ketý mańyzdyraq», — dedi Máýlen Áshimbaev Senattyń sońǵy otyrysynan keıingi brıfıńte.
Máýlen Áshimbaev Memleket basshysy júktegen kez kelgen mindetti oryndaýǵa jáne el ıgiligi úshin tynymsyz eńbek etýge daıyn ekenin málimdedi. «Qandaı laýazymda bolsam da, Memleket basshysy qoıǵan maqsattarǵa jetý jolyndaǵy jumysty jalǵastyramyn. Ádiletti Qazaqstandy qurýǵa, eldegi reformalyq kún tártibin júzege asyrýǵa óz úlesimdi qosamyn. Qazaqstannyń turaqty jáne teńgerimdi damýyna, elimizdiń tabysty, gúldengen, keleshegi zor, áleýmettik-demokratıalyq memleketke aınalýyna járdemdesý úshin bar kúshimdi salamyn», — dep túıindedi ol.