Pavlodar oblysy Maıaqaıyn kentiniń turǵyny jedel medısınalyq járdem qyzmetkerin balaǵattap, jumysyna kedergi jasaǵany úshin 129 750 teńge aıyppul tóleıtin boldy, dep habarlaıdy infohub.kz saıty.
Pavlodar oblystyq jedel medısınalyq járdem stansıasynyń Instagram-daǵy resmı paraqshasynda jazylǵandaı, Baıanaýyl aýdandyq soty 103 qyzmetiniń qyzmetkerine bylapyt sóılep, onyń kásibı jumysyna kedergi jasaǵan áıeldi ákimshilik jaýapkershilikke tartty.
Sotqa jetken oqıǵa 5 qyrkúıekte Maıaqaıyn kentinde boldy. Jedel járdem brıgadasy shaqyrtý boıynsha úılerdiń birine keldi — qyzdyń jaǵdaıy nasharlaǵan edi. Medıkter oqıǵa ornynda naýqastyń jaǵdaıyn anyqtap, oǵan kómek kórsetýge tyrysty.
«Osy ýaqyttyń barlyǵynda derlik qasynda 103 qyzmetiniń feldsherin balaǵattap, tipti jumysyna kedergi jasaýǵa tyrysqan áıel boldy. Munyń bári Pavlodar oblystyq jedel járdem stansıasynyń ókilderi bir jyldan astam ýaqyt boıy árbir shaqyrtý kezinde paıdalanyp júrgen beınetirkegishke jazylyp qaldy. Osy jazba sotta quqyq buzýshylyqtyń negizgi dáleli boldy», — dedi 103 qyzmetinde.
Sot áıeldi QR ÁQBtK-niń 80-1-babynyń 2-bóligimen (Medısınalyq nemese farmasevtıkalyq qyzmetkerlerdi qyzmettik mindetterin atqarý kezinde qurmettemeýshilik tanytý) ákimshilik jaýapkershilikke tartty. Jaza retinde birinshi satydaǵy sot oǵan 30 AEK (129 750 teńge) mólsherinde aıyppul saldy. Sheshim 17 qyrkúıekte shyǵarylyp, áli zańdy kúshine engen joq.