Máz bolady bolysyń,
Arqaǵa ulyq qaqqanǵa,
Sheltireıtip orysyń,
Shendi shekpen japqanǵa.

Kúnde jaqsy bola ma,
Bir qylyǵy jaqqanǵa?
Oqaly ton tola ma,
Ar-uıatyn satqanǵa?!

Kúlmeń qaǵyp qasqaıyp,
Salynyp ap maqtanǵa,
Tańqalamyn, qampaıyp
Joqty-bardy shatqanǵa.

Úıi máz bop, qoı soıdy
Súıinshige shapqanǵa.
Áýre qyldy, saldy oıdy
Úıdegi tynysh jatqanǵa.

Esh nárse emes jubanar,
Aqyl kózben baqqanǵa.
Jas baladaı qýanar
Bir dámdini tatqanǵa.

Kózi barlar oıynyń
Kúler kótin ashqanǵa.
Qasıetin boıynyń
Beker tógip shashqanǵa.

Qýanarlyq qyz emes
Jyltyraýyq taqqanǵa.
Ózgelerdi, biz emes,
Túsirmekshi qaqpanǵa.

Osy da esep bola ma
Ar, abuıyr tapqanǵa?
Mıyń bolsa jolama
Bos jeligip shapqanǵa.


Bir bes nadan, ońbassyń,
Nansań, onyń qosqanǵa.
Jasyq, jaman bolmassyń,
Jamandyqtan qashqanǵa.

Ol «boldym-aq» deı berer,
Bulǵaq qaǵyp basqanǵa.
Eleń qaǵyp elbirer,
Elertip kózdi aspanǵa.

Jaıy málim shoshqanyń,
Túrtkeninen jasqanba.
Bir ǵylymnan basqanyń
Keseli kóp asqanǵa.

Odan úmit kim qylar,
Jol tabar dep sasqanda?
Úıtip asqan jolyǵar
Keshikpeı-aq tosqanǵa.

---