Qazaqstanda bıyl jazda júrgizýshilerge arnalǵan №073/ý nysandaǵy medısınalyq anyqtamany rásimdeý kúrt ósti: maýsymda 37 myńǵa jýyq qujat berilse, tamyzǵa qaraı bul kórsetkish tórt esege ulǵaıdy. Ajıotajdyń sebebin Densaýlyq saqtaý mınıstrligi túsindirdi, dep habarlaıdy infohub.kz saıty.
«№073/ý nysandaǵy elektrondyq anyqtamalardyń sany aıtarlyqtaı ósti. Aǵymdaǵy jyldyń maýsymynda barlyǵy 36 994 anyqtama rásimdeldi, shildede – 84 720, bul ótken aımen salystyrǵanda 129%-ǵa kóp», – delingen vedomstvo habarlamasynda.
Tamyzda rásimdelgen anyqtamalardyń sany 147 522-ge jetip, shildemen salystyrǵanda taǵy 74%-ǵa ósti.
Sebebi nede
Densaýlyq saqtaý mınıstrligi ajıotajdy İshki ister mınıstrliginiń zeınetkerlik jastaǵy júrgizýshilerge qatysty baqylaýyn kúsheıtýimen túsindirdi.
«№073/ý nysandaǵy elektrondyq anyqtamalar sanynyń ósýi İshki ister mınıstrliginiń 65 jáne odan joǵary jastaǵy azamattarǵa, sondaı-aq eki jylda bir ret medısınalyq tekserýden ótýi tıis múgedektigi bar adamdarǵa qatysty baqylaýyn kúsheıtýimen baılanysty», – delingen habarlamada.
Eske salaıyq, Qazaqstanda 25 tamyzdan bastap júrgizýshilerge arnalǵan jańa erejeler kúshine endi. Endi 65 jastan asqan kólik júrgizýshileri eki jylda bir ret mindetti medısınalyq tekserýden ótýi qajet. Kásibı tekserýden ótý tártibin İİM túsindirgen bolatyn.
«Kýrsıv» jazǵandaı, Nevrozdar men Alsgeımer aýrýyn emdeý ortalyǵynyń basshysy Jibek Joldasovanyń pikirinshe, mundaı kásibı tekserýlerdi engizý jol-kólik oqıǵalaryna ákelýi múmkin tanymdyq buzylystardy anyqtaýǵa kómektesedi.
Sondaı-aq mindetti medısınalyq tekserýden ótý tájirıbesi týraly buryn almatylyq Irına Blok aıtqan edi. Ol dárigerler is júzinde tekserý júrgizbegenin málimdedi.