Qazaqstan Densaýlyq saqtaý mınıstrligi medısına qyzmetkerleriniń kásibı jolyn tolyq sıfrlandyrýdy josparlap otyr. Bul — oqý ornyna túsýden bastap jumysqa ornalasý, biliktilikti arttyrý jáne mansaptyq ósýge deıingi kezeńderdi qamtıdy. Vedomstvo kadrlyq resýrstardy esepke alý júıesine ózgerister engizdi. Bul ózgerister medıkterge arnalǵan biryńǵaı sıfrlyq keńistik qurýǵa, kadr saıasatynyń tıimdiligin arttyrýǵa jáne eldiń dárigerler men orta medısına qyzmetkerlerine degen qajettiligin dálirek boljaýǵa múmkindik beredi, dep habarlaıdy infohub.kz inbusiness.kz-ke silteme jasap.
Mınıstrlik 2020 jylǵy 11 jeltoqsandaǵy № QR DSM-253/2020 «Densaýlyq saqtaý salasyndaǵy kadrlyq resýrstardy esepke alý (kásibı tizilim júrgizý) qaǵıdalaryn bekitý týraly» buıryqqa ózgerister engizý týraly buıryq jobasyn ázirledi. Qujat Ulttyq kadrlyq resýrstardy esepke alý júıesin damytýdy jáne medısına qyzmetkerleriniń daıarlyǵy, oqýy, kásibı qyzmeti men damýy týraly aqparatty biriktiretin biryńǵaı sıfrlyq platforma qurýdy kózdeıdi.
Jobaǵa túsindirme jazbada: «Bastamanyń basty mindeti — medısına mamandarynyń búkil kásibı jolyn sıfrlandyrý. Biryńǵaı júıede olardyń mansabynyń barlyq kezeńderi — medısınalyq kolejge nemese joǵary oqý ornyna túsýden bastap, keıingi oqý, rezıdentýradan ótý, jumysqa ornalasý, biliktilikti arttyrý jáne úzdiksiz kásibı damý kórinis tabady», — delingen.
Mınıstrlikte Ulttyq esepke alý júıesin jetildirý mamandar daıarlaýdy josparlaýdyń tıimdiligin arttyrýǵa, medısınalyq uıymdardy bilikti kadrlarmen qamtamasyz etýge jáne medısınalyq kómek sapasyn jaqsartýǵa múmkindik beretinin atap ótti.
Jobada Ulttyq kadrlyq resýrstardy esepke alý júıesin qalyptastyrý, súıemeldeý, júıelik-tehnıkalyq qyzmet kórsetý jáne kıberqaýipsizdiktiń jańa qaǵıdalaryn, sondaı-aq densaýlyq saqtaý salasyndaǵy bilim alýshylar men mamandardy esepke alýdyń jeke qaǵıdalaryn bekitý usynylady.
Túsindirme jazbada: «Negizgi jańalyqtardyń biri — medısına qyzmetkerlerin daıarlaý men kásibı damytýdyń biryńǵaı sıfrlyq traektorıasyn qurý. Oqý men eńbek qyzmetiniń árbir kezeńi týraly aqparat biryńǵaı sıfrlyq keńistikte qalyptasyp, saqtalady. Bul árbir medıktiń kásibı damýynyń tolyq jáne ózekti beınesin jasaýǵa múmkindik beredi», — dep atap ótilgen.
Kásibı tizilim kadrlardy daıarlaý, stýdentter men dáriger-rezıdentterdiń bilim traektorıasy, kásibı qyzmeti, biliktilik deńgeıi, úzdiksiz damýy, kadrlyq qozǵalysy, sondaı-aq densaýlyq saqtaý salasynyń ártúrli baǵyttaǵy mamandarǵa degen qajettiligi týraly derekterdi jınaqtaıdy.
Taǵy bir mańyzdy baǵyt — tizilimniń memlekettik aqparattyq júıelermen ıntegrasıasyn keńeıtý. Bul aqparattyń durystyǵy men ózektiligin arttyrady, derekterdiń qaıtalanýyn boldyrmaıdy jáne ártúrli memlekettik resýrstar arasynda tıimdi aqparat almasýdy qamtamasyz etedi.
Jobada aqparatty qorǵaýǵa erekshe kóńil bólingen. Qujat kıberqaýipsizdikke, aqparattyq júıeni súıemeldeýge jáne medısına qyzmetkerleriniń derbes derekterin qorǵaýǵa qoıylatyn talaptardy kúsheıtedi.
Júıeni jańǵyrtý densaýlyq saqtaý salasynyń kadrlyq áleýetin basqarý sapasyn arttyrýǵa múmkindik beredi dep kútilýde. Jańa sıfrlyq quraldar mamandarǵa degen qajettilikti dálirek boljaýǵa, memlekettik bilim berý tapsyrysyn qalyptastyrýdy jetildirýge, túlekterdiń jumysqa ornalasýyn baqylaýǵa jáne tıimdi kadrlyq sheshimder qabyldaýǵa múmkindik beredi.
Jobany iske asyrý azamattar úshin medısınalyq kadrlardy daıarlaý men bólýdiń neǵurlym zamanaýı, ashyq jáne tıimdi júıesin qurýdy bildiredi. Bul aýrýhanalar men emhanalardyń qajetti mamandarmen ýaqytyly qamtamasyz etilýine jáne Qazaqstannyń barlyq óńirlerinde medısınalyq kómektiń qoljetimdiligi men sapasynyń artýyna yqpal etýi tıis.
Densaýlyq saqtaý mınıstrligi jańartylǵan júıeni engizý kadrlyq aqparattyń durystyǵyn qamtamasyz etetinin, medısına qyzmetkerlerine degen qajettilikti boljaý tıimdiligin arttyratynyn, memlekettik tapsyrysty qalyptastyrý tetigin jetildiretinin, túlekterdiń jumysqa ornalasýyn baqylaýdy kúsheıtetinin jáne densaýlyq saqtaý salasyndaǵy kadr saıasatyn neǵurlym zamanaýı jáne ıkemdi etetinin atap ótti.