2027 jyldan bastap Reseıde sheteldik jumysshylardy baqylaýdyń jańa, neǵurlym qatań erejeleri kúshine enedi. Bul týraly Reseı Federasıasy Qaýipsizdik keńesi tóraǵasynyń orynbasary Dmıtrı Medvedev «Vedomostı» basylymyna bergen úlken suhbatynda málimdedi, dep habarlaıdy infohub.kz saıty.
Medvedevtiń aıtýynsha, jekelegen aýmaqtarda mıgranttardyń shoǵyrlanýy el azamattaryn negizdi túrde alańdatyp otyr. «Eń aldymen, iri aglomerasıalardaǵy shoǵyrlaný azamattarymyzdy ábden negizdi alańdatady. Bul kóbine kelgenderdiń otbasy músheleriniń osynda bolýymen, olardyń orys tilin nashar bilýimen, bizdiń normalar men dástúrlerdi saqtaǵysy kelmeýimen, sondaı-aq sheteldikterdiń quqyqqa qaıshy áreketterimen baılanysty. Mundaı qylmystardyń keıbiri óte úlken rezonans týdyrady», — dedi ol.
2027 jyldyń qańtarynan bastap zańnyń sheteldik jumysshylar ózin jáne otbasyn óńirlik koefısıentke kóbeıtilgen eń tómengi kúnkóris deńgeıinen kem emes deńgeıde ustaýǵa mindetteıtin erejeleri kúshine enedi. Eger salyq organdary mıgranttyń tabysy bar ekenin rastamasa nemese onyń talap etiletin mólsherge sáıkes kelmeıtinin anyqtasa, patent nemese jumysqa ruqsat jaramsyz dep tanylady, al sheteldiktiń ózi men onyń otbasy músheleri Reseıde bolý quqyǵynan aıyrylady.
Sonymen qatar, Qaýipsizdik keńesi tóraǵasynyń orynbasary atap ótkendeı, kóshi-qon salasyndaǵy baqylaý, onyń ishinde bıometrıalyq derekter men genom boıynsha kúsheıtiledi. Sheteldikter endi 30 kún ishinde tek qaýipti juqpaly aýrýlarǵa ǵana emes, esirtki zattaryn qoldanǵanyna da medısınalyq kýálandyrýdan ótýge mindetti.
Medvedev sondaı-aq azamattyq týraly zańǵa qabyldanǵan ózgeristerdi eske saldy. Bul ózgerister alynǵan azamattyqty toqtatý negizderiniń tizimin aıtarlyqtaı keńeıtedi. «Mundaǵy ustanym aıqyn: jumys isteýge keldiń — bizdiń ádet-ǵurypty qurmette jáne reseılik zańnamany saqta. Daıyn bolmasań — elden ket!» — dep qorytyndylady ol.