MEGOGO onlaın-kınoteatry sońǵy úsh aıdaǵy «Aýdıo» bólimindegi qazaqstandyq paıdalanýshylardyń qalaýyn taldap, elde neni jáne qashan jıi tyńdaıtynyn anyqtady. Maýsymnyń basty trendi — bıznes-ádebıet pen klasıkalyq romandarǵa degen erekshe qyzyǵýshylyq, sondaı-aq jergilikti podkasttardyń aýdıoformatta tanymaldyǵynyń artýy, dep habarlaıdy infohub.kz saıty.

Platformadaǵy aýdıokitaptar reıtıńiniń sózsiz kóshbasshysy — Djordj Kleısonnyń qarjylyq saýattylyq týraly kúlttik kitaby «Vavılondaǵy eń baı adam». Ol ári biregeı tyńdaýshylar sany, ári tyńdaýǵa jumsalǵan ýaqyt boıynsha birinshi oryndy ıelenip otyr. Úzdik úshtikke sondaı-aq máńgilik klasıkalyq romandar — Emılı Bronteniń «Daýyldy asý» jáne Aleksandr Dúmanyń «Monte-Krısto grafy» endi.

Sonymen qatar, platformadaǵy eń suranysqa ıe on aýdıokitaptyń qataryna irgeli týyndylar — Sýn-szydiń «Soǵys óneri», Gomerdiń «Odısseıasy» jáne Júl Vernniń shyǵarmalar jınaǵy kirdi.

MEGOGO analıtıkasy tyńdaýshylardyń jergilikti kontentke erekshe mán beretinin kórsetti. Eń tanymal on aýdıoónimniń qataryna qazaqstandyq jobalar — «Kıno aıtshy» jáne «Áke tolǵaǵy» podkasttary senimdi túrde endi. Reıtıńte joǵary oryndardy «Zamandas» tanymal podkasty da turaqty túrde ıelenip keledi.

Janrlyq qalaýlardy taldaý qazaqstandyq paıdalanýshylardyń qyzyǵýshylyǵy klasıka men jeke tıimdilik arasynda bólinetinin kórsetti. Platformadaǵy eń tanymal janrlar: klasıkalyq ádebıet — aýdıo bóliminiń barlyq aýdıtorıasynyń 27,5%; motıvasıa jáne ózin-ózi damytý — 15,7%; bıznes jáne qarjy — 12,6%; shytyrman oqıǵaly ádebıet — 11,1%; balalar ádebıeti — 5,4%.

Tyńdaýshylardyń apta kúnderi boıynsha belsendiligi de qyzyqty bólindi. Aýdıokitaptar men podkasttardy tyńdaý shyńy turaqty túrde dúısenbige keledi. Paıdalanýshylar ónimdi jumys aptasyna beıimdeledi nemese tańerteńgi kepteliste ýaqytty ótkizedi degen boljam bar. Bilim men kitap aýdıoformaty úshin ekinshi tanymal kún — seısenbi, úshinshisi — juma. Podkasttar men aýdıokitaptarǵa eń az qyzyǵýshylyq jeksenbide baıqalady.

«Biz kontentti sanaly tutyný trendiniń turaqty ekenin kórip otyrmyz. Qazaqstandyqtar ózin-ózi tárbıeleý, qarjylyq saýattylyqty meńgerý jáne álemdik klasıkamen tanysý úshin aýdıoformatty jıi tańdaıdy. Sonymen qatar, qazaq tilindegi kontent pen jergilikti avtorlardyń jobalaryna suranystyń artýy bizdi qýantady, olar búginde álemdik bestsellerlermen teń dárejede básekelesedi», — dep pikir bildirdi MEGOGO kompanıasynyń bas dırektory Nurlan Shúkibaev.