Meksıkanyń Sınaloa shtatyndaǵy Kýlıakan qalasynda myńdaǵan adam kóshege shyǵyp, esirtki kartelderi arasyndaǵy qaqtyǵysty toqtatýdy talap etti. Sherý qaqtyǵys bastalǵanyna eki jyl tolýyna oraılastyrylyp uıymdastyryldy, dep habarlaıdy infohub.kz saıty.
AQSH-ta izdeýde júrgen esirtki barondarynyń biri Ismael «El Maıo» Sambada ustalǵannan keıin alaýyzdyq tutanǵan edi. Onyń jaqtastary — «La Maıısa» — ony Sınaloa karteliniń atyshýly negizin qalaýshy Hoakın «El Chapo» Gýsmannyń uly satyp ketti dep aıyptap, onyń tobynyń múshelerine — «Los Chapıtosqa» — qarsy shyqty.
Eki top júk kólikterin basyp alyp, órtep, joldy bógep, tutqıyldan shabýyl jasap, kólikten atyp ketýdi jıi uıymdastyrady. Kýlıakan turǵyndary osy ózara qyrqys soǵystyń ortasynda qaldy.
Resmı derekterge qaraǵanda, shtatta kisi óltirý men joǵalý oqıǵalarynyń sany ǵana emes, bopsalaý men tonaý da kúrt ósti.
Jeksenbidegi narazylyqty qurbandardyń týystary, jergilikti kásipkerler, azamattyq qoǵam uıymdary men katolık shirkeýi uıymdastyrdy.
Kásipker Serhıo Esker Frans-Press aqparat agenttigine qaqtyǵys bastalǵannan beri 5 myńnan astam kásiporyn jabylǵanyn aıtty. «Sınaloa bastan keship otyrǵan qasiret — osy», — dedi ortalyq-solshyl opozısıalyq «Azamattyq qozǵalys» partıasynyń jetekshisi Esker.
İs-shara Kýlıakan epıskopy soǵysyp jatqan toptardyń múshelerin zorlyq-zombylyqty toqtatýǵa shaqyrǵan messadan bastaldy.
«Toqtańdar, ne bolyp jatqanyna qarańdar, zardap shekken otbasylarǵa, jastarǵa jáne qalamyzǵa kóz salyńdar. Qandaı da bılik, aqsha, aýmaq nemese ambısıa adam ómirinen qymbat emes», — dedi ol.
Narazylyqqa ótken aptada qaladaǵy atys kezinde basyna oq tıip qaza tapqan bir jasar balanyń týystary da qatysty.
Zorlyq-zombylyq tolqynynan bólek, Sınaloa shtaty sońǵy aılarda saıası qaljyraýdy da bastan keshti.
Sáýirde AQSh prokýrorlary shtat ákimi Rýben Rocha men taǵy toǵyz qazirgi jáne burynǵy sheneýnikti «Los Chapıtospen» sóz baılasyp, AQSH-qa esirtki jetkizdi dep aıyptady.
Kinásin moıyndamaǵan Rocha Meksıka prokýrorlary ózderi tergeý bastaǵansha ýaqytsha qyzmetinen ketti. Úsh apta buryn ol qyzmetine qaıta oraldy, biraq birneshe kúnnen keıin prezıdent Klaýdıa Sheınbaým áleýmettik jelide ony tikeleı atamaı-aq «qaǵıdatsyz bılik menmendikke aınalady» dep jazǵan soń, taǵy da demalys surady.