Qazaqstan Qarjy mınıstrligi erekshe tártippen memlekettik satyp alý erejelerine ózgerister engizý jobasyn ázirledi. Onda shektik mánderden asqan jaǵdaıda jekelegen satyp alýlardy biryńǵaı uıymdastyrýshylarǵa berý kózdelgen, dep habarlaıdy infohub.kz.
Qujat «Ashyq NQA» portalynda jarıalandy. Qarjy mınıstrligi «Qazaqstan Respýblıkasy Qarjy mınıstriniń 2024 jylǵy 7 qazandaǵy № 671 „Erekshe tártippen memlekettik satyp alýdy júzege asyrý Qaǵıdalaryn bekitý týraly“ buıryǵyna ózgerister men tolyqtyrý engizý týraly» buıryq jobasyn talqylaýǵa usyndy. Qujat erekshe tártippen júzege asyrylatyn memlekettik satyp alý júıesin jetildirý aıasynda ázirlengen.
Negizgi ózgeris — jekelegen memlekettik satyp alýlardy ótkizý ókilettigin satyp alýdyń biryńǵaı uıymdastyrýshylary deńgeıine berý. Bul rette jergilikti atqarýshy organdardyń memlekettik satyp alý basqarmalary týraly aıtylady. Mundaı tetik satyp alý quny Qazaqstan Respýblıkasy Qarjy mınıstriniń 2024 jylǵy 28 tamyzdaǵy № 589 «Taýarlar, jumystar, kórsetiletin qyzmetter tizbelerin bekitý týraly» buıryǵynda belgilengen shektik mánderden asqan kezde qoldanylady.
Osylaısha, belgilengen ólshemsharttarǵa sáıkes keletin erekshe tártiptegi satyp alýlar memlekettik satyp alýdyń biryńǵaı uıymdastyrýshylary arqyly ortalyqtandyrylyp ótkiziletin bolady. Jobaǵa túsindirmede atap ótilgendeı, usynylyp otyrǵan ózgerister memlekettik satyp alý týraly zańnamany odan ári jetildirýge, sondaı-aq satyp alý rásimderin uıymdastyrý tıimdiligin arttyrýǵa baǵyttalǵan.