Meta Platforms kompanıasy amerıkandyq shtattardyń barlyǵyna jýyǵynyń talaptaryn retteý úshin on jyl ishinde 18 mıllıard dollarǵa deıin tóleý týraly kelisimge qol jetkizdi. Bılik korporasıany Facebook pen Instagram jelileri kámeletke tolmaǵandarda táýeldilik týdyrady, al Meta óz platformalarynyń qaýipterin jasyrdy dep aıyptaǵan bolatyn, dep habarlaıdy infohub.kz saıty.
Kelisim 18 tamyzda bastalǵan federaldy sot prosesin aıaqtaıdy. Kalıfornıa, Kolorado, Kentýkkı jáne Nú-Djersı kompanıadan azamattyq aıyppul retinde shamamen 200 mıllıard dollar talap etýdi josparlaǵan.
Meta zań buzýshylyqty moıyndamady, alaıda shtattarǵa ótemaqy tóleýge jáne jasóspirimderdiń platformalardy paıdalaný erejelerin ózgertýge kelisti.
«Bul istiń maqsaty — balalarymyzdy qorǵaý», — dedi Kolorado shtatynyń bas prokýrory Fıl Vaızer.
Kelesi on jyl ishinde Meta jasóspirimderdiń Facebook pen Instagram jelilerin kúnine eki saǵatpen shekteýi tıis. Ata-anasynyń kelisiminsiz kámeletke tolmaǵandar túngi 00:00-den 06:00-ge deıin platformalardy paıdalana almaıdy.
Sonymen qatar, kompanıa oqý ýaqytynda (08:00-den 15:00-ge deıin) push-habarlandyrýlardyń kópshiligin óshirýge, balalardy jas shekteýi bar kontentten qorǵaýdy kúsheıtýge, paıdalanýshylardyń jasyn tekserýdi jetildirýge jáne jasóspirimderdiń belsendiligin arttyratyn keıbir fýnksıalardy shekteýge mindettendi.
Snapchat, TikTok jáne YouTube osyǵan uqsas sharalardy engizse, shekteýler qatańdaýy múmkin. Degenmen, kelisim Meta-ny jekelendirilgen usynystar men maqsatty jarnamadan bas tartýǵa mindettemeıdi. Sondaı-aq, ol jasóspirimderdiń óz syrtqy kelbetin qabyldaýyna teris áser etýi múmkin kontenttiń bir bóligin qozǵamaıdy.
Kompanıada jas paıdalanýshylardyń qaýipsizdigi olardyń basty basymdyqtarynyń biri bolyp qala beretinin málimdedi. «Biz ata-analar men jasóspirimder úshin bárin durys jasaǵymyz keledi», — dedi Meta ókilderi.
Kelisimniń negizgi bóligi 47 shtatqa, Vashıngtonǵa, Pýerto-Rıkoǵa, Amerıkandyq Samoaǵa jáne Soltústik Marıana araldaryna 16,7 mıllıard dollarǵa deıin tólemderdi qarastyrady. Kalıfornıa shamamen 2,2 mıllıard dollar, al Nú-Iork 1,1 mıllıard dollar ala alady. Tehas 1 mıllıard dollardan astam somaǵa jeke kelisim jasady.
Meta shamamen 12,7 mıllıard dollar tóleýge kepildik berdi. Taǵy 5 mıllıard dollardy kompanıa Snap, TikTok jáne YouTube da balalardy qorǵaýdyń osyndaı sharalaryn engizgen jaǵdaıda aýdarady. Keıbir shtattarda alynǵan qarajat balalardyń psıhıkalyq densaýlyǵyn qoldaý baǵdarlamalaryna jumsalady. Basqa aımaqtarda aqsha jalpy búdjetke túsedi.
Meta sondaı-aq Cambridge Analytica janjalyna baılanysty talaptardy retteý úshin 459 mıllıon dollar tóleıdi. Brıtandyq konsaltıńtik kompanıa ruqsatsyz mıllıondaǵan Facebook paıdalanýshylarynyń jeke derekterin alǵan bolatyn.