Meta Platforms kompanıasyna qarsy iri sot prosesiniń alǵashqy tyńdaýy seısenbide Kalıfornıanyń federaldy sotynda bastalady. Kalıfornıa, Kolorado, Kentýkkı jáne Nú-Djersı shtattarynyń bas prokýrorlary kompanıadan aıtarlyqtaı qarjylyq ótemaqy tóleýdi jáne Facebook pen Instagram jumysyna ózgerister engizýdi talap etýde. 2023 jyly 29 shtat balalar qaýipsizdigi men qupıalylyǵyna qatysty tehnologıalyq alypty sotqa bergen bolatyn, qalǵan 25 shtattyń isteri keıinirek qaralady. Kompanıa sondaı-aq shtattyq sottarda da sottalýda. Bul týraly infohub.kz habarlady.
Talapkerler áleýmettik medıa alyby jasóspirimderdiń nazaryn aýdarý úshin ádeıi fýnksıalardy jasap, olardyń psıhıkalyq densaýlyǵyna zıan keltirdi dep málimdeıdi. Sondaı-aq, Meta 13 jasqa tolmaǵan balalardyń derekterin ata-anasynyń kelisiminsiz jınap, federaldy zańdy buzǵanyn aıtady. Kentýkkı shtatynyń bas prokýrory Rassel Koýlmannyń aıtýynsha, bul Amerıka tarıhyndaǵy tutynýshylardy qorǵaý boıynsha eń iri sot isi. Ol Meta óz ónimderiniń jasóspirimderge keltiretin zıany týraly bilgenin jasyrǵanyn, óıtkeni buǵan kóz jumý tıimdirek bolǵanyn aıtty.
Meta óz kezeginde istiń óz paıdasyna sheshiletinine senimdi ekenin bildirdi. Kompanıa málimdemesinde platformalarynda jasóspirimderdi qorǵaýdaǵy jetistikteri men osy ister qozǵalǵanǵa deıin jyldar boıy jasaǵan kúsh-jigerimen maqtanatynyn aıtty. Sotta sýdıa men alqabılerge osy faktilerdi kórsetýdi asyǵa kútetinin jetkizdi.
İsti Oklendtegi AQSh okrýgtik sýdıasy Ivonn Gonsales Rodjers qaraýda. Sot prosesi alty-segiz aptaǵa sozylýy kútilýde, Meta bas dırektory Mark Sýkerberg pen basqa da basshylar men burynǵy qyzmetkerler kýálik beredi. Rodjers 2011 jyly prezıdent Barak Obama taǵaıyndaǵan, ol iri tehnologıalyq kompanıalarǵa qatysty kúrdeli isterdi, sonyń ishinde Ilon Masktyń OpenAI-ge qarsy isin jáne Epic Games-tiń Apple-ge qarsy isin qaraǵan.
Bul sot prosesi Meta jáne basqa da áleýmettik medıa kompanıalaryna, onyń ishinde Google-diń YouTube, TikTok jáne Snap platformalaryna qarsy qozǵalǵan sot isteriniń bir bóligi bolyp tabylady. Olardyń platformalary jasóspirimderge zıan keltiredi, olardyń derekterin zańsyz jınaıdy jáne ádeıi táýeldilik týdyrady dep aıyptalýda.