Qazaqstandyq ánshi Dımash Qudaıbergenniń ánderi FIFA 2026 fýtboldan álem chempıonaty kezinde Meksıkanyń Sapopan qalasyndaǵy resmı FIFA Fan Fest-te oryndaldy, dep habarlaıdy infohub.kz saıty.
FIFA Fan Fest — álem chempıonatynyń eń iri resmı fan-aımaqtarynyń biri, ony FIFA Halısko shtatynyń úkimetimen birlesip uıymdastyrdy. Munda machtardyń translásıasymen qatar, konsertter, mádenı baǵdarlamalar, gastronomıalyq festıváldar men túrli ınteraktıvti is-sharalar ótedi.
Dımashtyń resmı jankúıerler saıtynyń habarlaýynsha, mýzykalyq baǵdarlamaǵa 13 jastaǵy meksıkalyq ánshi Anhel Herardo Kovarrýbıas Kabrera (sahnalyq aty — Angeloo) qatysty. Onyń aıtýynsha, Dımashtyń shyǵarmashylyǵymen ol 10 jasynda tanysyp, onyń daýysy men ánderi arqyly jetkizetin ıdeıalarynan shabyttanǵan.
2025 jyly Angeloo ıspan tilindegi SOS ánin oryndap, La Voz Zapopan de los Niños y las Niñas balalar vokaldyq baıqaýynda jeńiske jetti. Osy jeńisiniń arqasynda ol FIFA Fan Fest sahnasynda óner kórsetýge shaqyrý aldy.
Eki myńnan astam kórermen aldynda jas ánshi Diva Dance, Sinful Passion jáne When I’ve Got You kompozısıalaryn oryndady. Onyń ónerin Dımashtyń meksıkalyq jankúıerler klýby Dears Jalisco Mexico músheleri qoldady.
«Dımashtyń habarlamasyn kóp adamǵa jetkizý meni qýanyshqa bóleıdi. Ol týraly múmkindiginshe kóp adam bilgenin qalaımyn jáne bir kúni onymen kezdesip, ómirimdi ózgertkeni úshin alǵys aıtýdy armandaımyn», — dedi Angeloo.