Álemge «kalıpso patshasy» atanyp ketken trınıdad-tobagolyq ánshi Mighty Sparrow 91 jasta qaıtys boldy. Ol jeksenbi kúni Nú-Iorkte otbasynyń ortasynda tynysh dúnıe saldy, dep habarlaıdy infohub.kz saıty.
Sahnada Mighty Sparrow degen laqap atpen tanylǵan Slınger Fransısko 1956 jyly «Jean and Dinah» ánimen kalıpso mýzykasynda tanymaldyqqa jetken edi. Otbasynyń málimdemesinde onyń qysqa ǵana syrqattan keıin ómirden ótkeni aıtyldy, ózge egjeı-tegjeı jarıalanbady.
«Ol — shoý-bıznes salasyndaǵy tutas bir ınstıtýt. Ánshi, án avtory jáne tálimger retinde sheberligi men iskerligimen joǵary baǵalandy, kópshilikke súıikti boldy», — delingen Fransısko otbasynyń málimdemesinde.
Trınıdad jáne Tobagonyń Birikken kalıpsonıster uıymy marqumdy «mádenıetimizdiń aıqyn daýysy, sheber áńgimeshi jáne mýzykasy kalıpsony Trınıdad pen Tobagodan búkil álemge taratqan alyp tulǵa» retinde este qaldyratynyn málimdedi.
Fransısko 1935 jyldyń shildesinde Grenadanyń jaǵalaýyndaǵy Grand-Roı qalasynda dúnıege kelgen. 1937 jyly ata-anasymen Trınıdad pen Tobagoǵa kóshkende ol áli sábı edi.
Kalıpso mýzykasynyń otany sanalatyn Trınıdad pen Tobagoda Mighty Sparrow esimi men beınesi paıda bolyp, osy janrda «Both of Them», «Congo Man», «Mr. Walker», «The Lizard» sekildi kóptegen hıt ánder jazdy.
Qurbylary ony «Birdie» dep te erkeletip ataıtyn. Alty onjyldyqqa sozylǵan shyǵarmashylyq jolynda júzdegen án jazdy. Álemniń birneshe elinde óner kórsetti, onyń ishinde Nú-Iorktegi ataqty Madison Square Garden sahnasynda da óner kórsetti.
Trınıdadtyq mádenıettanýshy jáne jazýshy doktor Rýdolf Ottlıdiń aıtýynsha, Fransısko búkil mansabynda kalıpso ónerin damytýdy maqsat etti.
«Mighty Sparrow — asqan oıyn-saýyq sheberi, mádenı revolúsıoner jáne álemniń eń uly kalıpsonısteriniń biri edi», — dedi Ottlı Associated Press agenttigine.
Trınıdad pen Tobago kompozıtor ári oryndaýshyny ulttyq marapattarmen atap ótti. 1987 jyly Batys Úndistan ýnıversıteti Fransıskoge qurmetti ádebıet doktory dárejesin berdi.