Aǵylshyn Premer-lıgasynyń chempıony «Arsenaldyń» bas bapkeri Mıkel Arteta klýbpen jańartylǵan kelisimshartqa kelisti, dep habarlaıdy infohub.kz saıty.
Ispanıalyq mamannyń qazirgi sharty osy maýsymnyń sońynda bitedi. Alaıda jańa kelisimshart jónindegi kelissózder birneshe aıdan beri júrip kele jatqan.
Bı-bı-sı Sport agenttigi osy aıdyń basynda taraptar kelisimge taıap qalǵanyn habarlaǵan edi. Qazir Artetanyń «Arsenaldaǵy» qyzmetin uzartý týraly túpkilikti kelisimge qol jetkizgeni belgili boldy.
Jańa kelisimsharttyń merzimi ázirge resmı túrde rastalǵan joq. Degenmen ol 2019 jyldyń jeltoqsanynda klýbqa kelgennen beri Artetanyń «Arsenaldaǵy» keminde onynshy jylyn qamtıdy dep boljanyp otyr.
Sonymen qatar jańa shart bapkerdiń qazirgi jyldyq 10 mıllıon fýnt sterlıńtik jalaqysyn aıtarlyqtaı arttyryp, oǵan qosa 5 mıllıon fýnt kólemindegi bonýsty da qarastyrady.
Kelisimshart týraly kelissózder jóninde sóılegen Arteta ótken aptada bylaı degen bolatyn: «Jankúıerlerge buǵan qatysty eshqandaı alańdaýshylyqtyń qajeti joq, óıtkeni men osynda bolǵym keledi. Men óte baqyttymyn jáne ózimmen birge jumys isteıtin adamdarmen qyzmettesýge shyn júrekten rızamyn».