90%-y qazaqstandyq mıllıoner Aleksandr Chýkreevke tıesili RETAM jyljymaıtyn múlik basqarý kompanıasy Óskemendegi ADK River saýda-oıyn-saýyq keshenin satty. Mámileniń quny 4,2 mlrd teńge bolýy múmkin, dep habarlaıdy infohub.kz saıty.
Kompanıa habarlamasynda jazylǵandaı, 22 sáýirdegi satyp alý-satý shartyna sáıkes Óskemendegi saýda-oıyn-saýyq kesheni — ADK River saýda ortalyǵy satyldy. Satyp alýshynyń aty jarıalanbaıdy: ol jeke tulǵa.
RETAM kompanıasy satylǵan ınvestısıalyq múliktiń quny ǵımarattar men qurylystar úshin 3,16 mlrd teńge, jer ýchaskesi úshin 1 mlrd teńge dep baǵalanǵanyn naqtylady. Sonymen qatar, birinshi toqsanda kompanıaǵa uzaq merzimdi aktıvterdi ótkizýden 4,2 mlrd teńge qarajat tústi, ol, shamasy, ADK River saýda ortalyǵyn bildiredi.
Kompanıanyń birinshi toqsanda múlik satýdan túsken kirisi 3,6 mlrd teńgeni qurady.
Aıta keteıik, RETAM kompanıasynyń 90%-y Forbes Kazakhstan reıtıńinde Qazaqstannyń eń baı bıznesmenderi arasynda 34-orynda turǵan kásipker Aleksandr Chýkreevke tıesili. Basylym onyń baılyǵyn 363 mln dollar dep baǵalaıdy. Qalǵan 10%-y Chýkreevtiń uly Nıkolaıǵa tıesili.
Forbes derekteri boıynsha, kásipker ulymen birge аlkogólsiz sýsyndar shyǵaratyn jáne taratatyn kompanıalardy jeke ózi jáne birlesip baqylaıdy. Olardyń qatarynda Dizzy, Riks, Ice Tea, Rix-Tea sýsyndaryn óndirýshiler, sondaı-aq Arzu Life Fitness jáne Asem-Ai Saryagash aýyz sýlary bar.
Buǵan deıin Aleksandr Chýkreevtiń, Dizzy jáne Ice Tea sýsyndaryn óndirýshilerdiń teń ıesi retinde tanymal, Almatydaǵy ADK saýda ortalyǵyna ıelik etetin RETAM kompanıasynan 2025 jyldyń qorytyndysy boıynsha shamamen 1,25 mlrd teńge dıvıdend alatyny habarlanǵan. Taǵy 110,2 mln teńge onyń uly Nıkolaı Chýkreevke tıesili bolady.