Minin aıtsa, buzylmas kimniń túsi,
Oılaǵanǵa ap-anyq tur munysy
Sasqanynan sandyraq jal aıtady,
Yza bolyp saqyldap ketik tisi.

Aıtypty qatynynyń bir oınasshysy:
«Nege oınas qylady eken baıly kisi?»
«Óziń nege qylasyń?» dep surasa,
Óıtpese buraıdy eken onyń ishi.

Keı ulyqtyń osyndaı bar belgisi,
Ony aıta almaı qurıdy eldiń mysy.
Ne kózinshe, ne syrttan minin aıtsań,
Ne qınap, ne keledi óltirgisi.

Ol ózi – túzetetin el basshysy,
Bul bolsa ulyǵynyń qylǵan isi.
Qarapaıym qazaqqa ne suraý bar
Ne súıse, sony qylsyn jabaıysy.

Birdeı adam kaıda bar ishi-tysy?
Mindimin dep kelmeıdi jyǵylǵysy.
«Dert jasyrǵan ajalsyz óler» degen,
Qazaqty ondyrmaıtyn – osynysy.

«Min túzelmeı, túzelmes el jumysy»
Degen joq pa burynǵy bilimdisi.
«Hany týra bolmasa, halqy ońbaıdy»,
Muny aıtqan – ótken erdiń jigerlisi.

Nápsi jeýden jalyqpas jazy, qysy,
Zorlyqtyń maqtanmen bar baılanysy.
Qaıtip ony taza dep aıta alarmyz,
Aıla, maqtan, zorlyqqa tolsa ýysy?

---