Qazaqstanda memleket baǵasyn retteıtin dárilik zattardyń tizimi qaıta qaraldy. Densaýlyq saqtaý mınıstrliginiń málimdeýinshe, 1 200-den astam arzan preparat budan bylaı naryqtyq baǵamen satylady, dep habarlaıdy infohub.kz saıty.

Memlekettik baǵa retteýinen quny bir aılyq eseptik kórsetkishten — 4 325 teńgeden aspaıtyn dáriler shyǵarylady. Jańartylǵan tizimde memlekettik baǵa retteýine jatatyn pozısıalar sany 3 039-nan 1 827-ge qysqardy.

«Jańartylǵan tizimge sáıkes memlekettik baǵa retteýine jatatyn pozısıalar sany 3 039-nan 1 827-ge qysqardy», — delingen vedomstvo habarlamasynda.

Mınıstrliktiń túsindirýinshe, memlekettik retteý naqtyraq bola túsip, halyqtyń qoljetimdiligin qosymsha qorǵaýdy qajet etetin dárilik zattarǵa baǵyttalady.

Dárilerdiń bir bóligin naryqtyq baǵaǵa kóshirý farmasevtıkalyq naryqty baqylaýdy kúsheıtýmen qatar júredi. Densaýlyq saqtaý mınıstrligi Qazaqstan Respýblıkasynyń Básekelestikti qorǵaý jáne damytý agenttigimen birlesip, baǵalardy baqylaý jáne tekserý tetikterin, onyń ishinde taýarlardy tańbalaý jáne qadaǵalaý aqparattyq júıesin paıdalaný arqyly pysyqtap jatyr.

Sıfrlyq quraldar dárilik zattardyń qozǵalysyn qadaǵalaýǵa jáne olardyń aınalymnyń ártúrli kezeńderindegi naqty baǵalaryn taldaýǵa múmkindik beredi. «Bul baǵanyń negizsiz kóterilýiniń yqtımal belgilerin ýaqtyly anyqtaýǵa múmkindik beredi. 2024 jyldyń shildesinde mindetti tańbalaý bastalǵannan beri júıeden shamamen 1,1 mlrd qaptama dárilik zat ótti», — dep atap ótti vedomstvoda.

Densaýlyq saqtaý mınıstrliginde qazaqstandyqtar úshin dárilik zattardyń baǵalyq qoljetimdiligin qamtamasyz etý jumysy jalǵasatynyn aıtty. Belgilengen shekti bólshek saýda baǵasynan asyp ketý faktileri anyqtalsa, azamattar DariKZ mobıldi qosymshasy arqyly rastaıtyn materıaldarmen — taýar chegimen jáne dárilik zattyń qaptamasymen — Qazaqstan Respýblıkasy Densaýlyq saqtaý mınıstrliginiń Medısınalyq jáne farmasevtıkalyq baqylaý komıtetiniń aýmaqtyq departamentterine ótinish jibere alady.

Buǵan deıin Qazaqstanda bes júzden astam dárilik preparattyń baǵasy arzandaǵany habarlanǵan bolatyn.