Vetnamda ótip jatqan «Mıss álem 2026» halyqaralyq baıqaýynda Qazaqstan atynan qatysýshy Baǵym Baltabaeva aqqý beınesindegi keremet kıimimen kórermender men áleýmettik jeli qoldanýshylarynyń súısinisine bólendi, dep habarlaıdy infohub.kz saıty.
Sahnaǵa arý kólemdi qaýyrsyn qanattary men aqqý tárizdi úlken bas kıimmen bezendirilgen aq kóılek-korsetpen shyqty. Bas kıim birshama daýly kórinip, kóılektiń sándi sulbasynan erekshelengenimen, kórermender qazaqstandyq arýdyń shyǵýyn úlken qoshemetpen qarsy aldy. Jarıalanymdardyń astyndaǵy pikirlerde bul beıneni «patshalyq» jáne erekshe názik dep ataıdy.
«Vaý! Laıyqty kıim», «Patshaıym», «Sizdiń beıneńiz eń keremeti», — dep jazady qoldanýshylar.
Eske salaıyq, bıyl Qazaqstan Tomırıs sarbaz áıel beınesinen bas tartýdy jón kórdi. Baltabaevanyń aıtýynsha, onyń ornyna ulttyq kıimniń negizine aqqý beınesi alynǵan.
«Ádette qazaq áıelderin kúshti, jaýynger retinde kórsetedi. Men basqa qyryn — sulýlyqty, náziktikti, danalyq pen ishki úılesimdilikti kórsetkim keldi. Sondyqtan basty sımvol aqqý boldy», — dedi ol.
Model aqqý tazalyqty, adaldyqty jáne rýhanı kúshti bildiretinin, sondaı-aq Kaspı teńizi men Qazaqstannyń tabıǵı murasymen baılanysty ekenin atap ótti.
Buǵan deıin Kursiv LifeStyle Ýganda ókili Trıvıa Ell Mýhozanyń «Mıss álem 2026» baıqaýynda «Ómir qabattary» dep atalatyn kóılekpen sahnaǵa shyqqanyn jazǵan bolatyn. Kıimdi jasaǵan dızaıner Kısha Abdallanyń túsindirýinshe, ol dárigerdiń kesar tiligi kezinde qıatyn áıel denesiniń qabattarynan shabyttanǵan.