«Mıss Qazaqstan-2024» ataǵyn ıelengen Baǵym Baltabaeva 7 tamyzda «Mıss álem-2026» halyqaralyq saıysynda Qazaqstandy tanystyrý úshin jolǵa shyǵady. Ushý aldynda Almatyda baspasóz máslıhaty ótip, onda sulý qyz halyqaralyq saıysqa daıyndyq pen ulttyq kostúm tujyrymdamasy týraly aıtyp berdi, dep habarlaıdy infohub.kz saıty.
Baltabaevanyń aıtýynsha, bıyl Qazaqstan Tomırıs sarbaz qyz beınesinen bas tartýdy jón kórip, ulttyq kostúmniń negizine aqqý beınesin alǵan. Degenmen, kıimniń ózin jýrnalıserge ázirge kórsetpedi.
«Ádette qazaq áıelderin kúshti, jaýynger etip kórsetedi. Men basqa qyryn — sulýlyqty, náziktikti, danalyq pen ishki úılesimdilikti kórsetkim keldi. Sondyqtan basty sımvol aqqý boldy», — dedi ol.
Model aqqý tazalyqty, adaldyqty jáne rýhanı kúshti bildiretinin, sondaı-aq Kaspı teńizi men Qazaqstannyń tabıǵı murasymen baılanysty ekenin atap ótti.
Qonaqtardyń kútkenine qaramastan, baspasóz máslıhatynda ulttyq kostúm kórsetilmedi. Uıymdastyrýshylar bul «Mıss álem» saıysynyń erejelerine baılanysty ekenin túsindirdi. Beıne halyqaralyq sahnaǵa resmı shyqqanǵa deıin qupıa bolýy kerek.
«Biz kostúmdi kórsetýdi qatty qaladyq, biraq, ókinishke qaraı, saıys talaptary buǵan jol bermeıdi. Sondyqtan kórermender ony alǵash ret „Mıss álem“ kezinde kóredi», — dep habarlady uıymdastyrýshylar.
Degenmen, kostúmniń bir kishkentaı bólshegin kórý múmkin boldy. Baltabaevanyń beınesimen jumys istegen dızaıner Instagram-da kıimniń bir bóligin jarıalady. Kadrlarda aq-kók tús, qanat pen qaýyrsyndy eske túsiretin kólemdi sándik elementter, krıstaldarmen kestelengen jáne bıik aq qaýyrsyndy bas kıim kórinedi.
Baltabaeva sondaı-aq qaıyrymdylyq jobasyn tanystyrý kezeńin eń kóp kútetinin aıtty. Onyń aıtýynsha, ol osy jobamen shamamen bir jarym jyl aınalysqan.
«Bul — men úshin eń shabyttandyratyn kezeń. Men bul jobaǵa kóp kúsh pen ýaqyt jumsadym, sondyqtan ony tanystyrý múmkindigin erekshe kútemin», — dedi Qazaqstan ókili.
Áleýmettik jobany qorǵaýdan basqa, qatysýshylardy sporttyq jarystar, daryn baıqaýy, fotosessıa, qazylar alqasymen suhbat jáne qabyldaýshy eldiń mádenıetimen tanysý kútip tur. Bıylǵy mereıtoılyq, 75-shi «Mıss álem» saıysy Vetnamda ótip, álemniń túkpir-túkpirinen 130-ǵa jýyq qatysýshyny jınaıdy.
Baltabaeva Óskemen qalasynan shyqqan. Ol Sársen Amanjolov atyndaǵy Shyǵys Qazaqstan ýnıversıtetin «Bastaýysh synyp muǵalimi» mamandyǵy boıynsha bitirgen jáne pedagogıka boıynsha ǵylymı olımpıadalardyń júldegeri, ýnıversıtet rektory men SHQO ákiminiń marapattaryna ıe.
«Mıss álem-2026» fınaly qyrkúıekte ótedi.