Qazaqstanda Disney kompanıasynyń «Moana» fılminiń kórsetilimi bastaldy. Qazaqstandyq ártisterdiń qaısysy ánderdi qazaq jáne orys tilderinde oryndaǵany belgili boldy, dep habarlaıdy infohub.kz saıty.
21 jastaǵy qazaqstandyq ánshi Sanat Asýat álemdik prokattaǵy orys tilindegi nusqada basty keıipkerdiń daýysy boldy. T. Júrgenov atyndaǵy Qazaq ulttyq óner akademıasynyń túlegi ári «Golos Azerbaıdjana» jobasynyń fınalısi úshin bul — dýblájdaǵy alǵashqy tájirıbe jáne kópten kútken armanynyń oryndalýy.
«Meni burynnan biletinder bul oqıǵanyń men úshin qanshalyqty mańyzdy ekenin túsinetin shyǵar. Men Disney-diń barlyq jobalaryn shyn júrekten jaqsy kóremin, endi meniń de osy sıqyrly álemniń bir bóligi bolǵan kezim keldi. Armandar oryndalatyny qandaı jaqsy!» — dep jazdy Sanat Instagram-da.
Ánshi Moana keıipkeriniń ózine óte jaqyn ekenin atap ótti. «Moana — batyl, erkin, árqashan óz jolymen, armany men maqsatyna qaraı júrýge daıyn, bul qazaq qyzynyń tarıhı beınesine uqsas. Osy tusta biz óte uqsaspyz. Sondaı-aq fılmde maǵan ata-babalarmen jáne óz rýymen baılanys taqyryby jaqyn. Men bul baılanysty tereń sezinemin jáne ol men úshin úlken mánge ıe», — dedi Sanat Asýat.
Ánshi Indıra Edilbaeva da óz tájirıbesimen bólisti. Ol Instagram-da jazba jarıalap, fılm premerasynan foto kórsetti. «Aqyry myna jańalyqty sizdermen bólise alamyn! Búgin „Moana“ fılminiń premerasy ótti, onda biz Nazıma jáne Taır Sahıevpen (Jaman T) birge „Vse vperedı“ jáne „Bári alda“ fınaldyq saýndtregin oryndadyq», — dedi Indıra. Ol sondaı-aq osyndaı aýqymdy jobanyń bir bóligi bolý — úlken maqtanysh ekenin qosty.