Qazaqstan mobıldi ınternet jyldamdyǵy boıynsha álemdik reıtıńte pozısıasynan aıyrylýda: 2026 jyldyń alǵashqy bes aıynda el 50-orynnan 56-orynǵa túsip, medıandyq jyldamdyq 12,1%-ǵa tómendegen, al álemde bul kórsetkish 4%-ǵa ósken. Bul týraly infohub.kz saıty habarlaıdy.
Energyprom.kz sarapshylarynyń málimetinshe, 2026 jylǵy mamyrda Qazaqstandaǵy mobıldi ınternettiń medıandyq jyldamdyǵy 88,11 Mbıt/s qurady, bul álemdik ortasha kórsetkishten (113,16 Mbıt/s) shamamen 25 Mbıt/s-qa tómen. Qańtarda bul kórsetkish 100,2 Mbıt/s bolsa, mamyrda 12,1%-ǵa tómendegen. Sol kezeńde álemdik ortasha jyldamdyq kerisinshe 4%-ǵa ósti.
Nátıjesinde Qazaqstan jahandyq reıtıńte birtindep pozısıasynan aıyrylýda. Qańtarda respýblıka 50-orynda bolsa, aqpanda 49-orynǵa kóterilgen, alaıda odan keıin tómendeý bastaldy: naýryzda 51-oryn, sáýirde 52-oryn, mamyrda 56-oryn. Osylaısha, bir aıda tórt, al jyl basynan beri alty pozısıaǵa joǵaltty.
Degenmen Qazaqstan Ortalyq Azıada áli de kóshbasshy. Ózbekstan 77-orynda (61,03 Mbıt/s), Qyrǵyzstan 82-orynda (51,56 Mbıt/s). Alaıda sarapshylar Qazaqstannyń artyqshylyǵy tez azaıyp jatqanyn atap ótedi: qańtarda Ózbekstanmen jyldamdyq aıyrmasy 47 Mbıt/s-tan assa, mamyrda 27 Mbıt/s-qa deıin qysqardy.
İri qalalarda da jaǵdaı máz emes. Almatyda mobıldi ınternet jyldamdyǵy qańtardan beri 22%-ǵa tómendep, qala álemdik reıtıńte 60-orynnan 84-orynǵa tústi. Astanada 17,4%-ǵa tómendep, elorda 17 pozısıaǵa joǵaltyp, 79-oryndy ıelendi. Alaıda eki qala da áli de álemdik ortasha kórsetkishten joǵary: mamyrda Astanada 120,7 Mbıt/s, Almatyda 115,55 Mbıt/s.
Sarapshylar kórsetkishterdiń nasharlaýyn eldiń aýmaǵynyń úlkendigimen ǵana túsindirý qıyn ekenin aıtady. Mysaly, aýdany boıynsha Qazaqstannan úlken Brazılıa mobıldi ınternet jyldamdyǵy boıynsha álemdik bestikke kiredi, al onyń eki qalasy jahandyq reıtıńtiń alǵashqy ondyǵynda.
Zertteý avtorlarynyń pikirinshe, basty másele – Qazaqstannyń reıtıńtegi aǵymdaǵy orny emes, teris dınamıka. Basqa elder mobıldi ınternetti jyldamdatyp jatqanda, Qazaqstan álemdik deńgeıden qalyp, ýaqyt óte kele Ortalyq Azıada da kóshbasshylyǵyn joǵaltý qaýpi bar. Jyldamdyqtyń tómendeý sebepteri – jelilerdiń shamadan tys júktelýi, bazalyq stansıalardyń jetispeýshiligi, operatorlardyń ınvestısıasynyń azdyǵy nemese trafıktiń ósýi – zertteýde ashylmaǵan.