Reseıde 28 jastaǵy aǵylshyn tili muǵalimi narkozben jasalǵan kolonoskopıadan keıin birneshe saǵat boıy oryssha sóılemeı qoıǵan. Bul týraly Mash Telegram-arnasy habarlady, dep jazady infohub.kz.
Arnaǵa aty-jónin atamaǵan endoskopıst dáriger aıtqandaı, er adam narkozdy birinshi ret alǵan. Prosedýradan keıin ol uzaq ýaqyt esin jıa almaǵan, al oıanǵan soń tek aǵylshynsha sóılegen. Dárigerler bir saǵattan astam ýaqyt pasıentti qalypty kúıge keltirýge tyrysqan, keıin áıelin shaqyrǵan.
Biraq áıelimen de er adam aǵylshynsha sóılep, aıqaılap, birdeńe túsindirýge tyrysqan. Mash jazǵandaı, orys tili birneshe saǵattan keıin, pasıent dárethanaǵa barǵysy keletinin aıtqanda qaıta oralǵan.
Mundaı jaǵdaılar medısınalyq ádebıette shynymen sıpattalǵan, alaıda qubylys óte sırek kezdesedi. Ony shetel tili sındromy dep ataıdy: adam biraz ýaqyt ana tilin qoldanbaı, ózi biletin ekinshi tilde sóıleı bastaıdy.
Mysaly, sıpattalǵan bir jaǵdaıda 17 jastaǵy pasıent ortopedıalyq operasıadan keıin nıderland tilin túsinýdi toqtatyp, shamamen bir táýlik boıy tek aǵylshynsha sóılesken. Keıin ol qaıtadan ana tilinde sóıleı bastaǵan.
Mundaı reaksıanyń naqty sebebi ázirge belgisiz. Ol anestezıadan shyǵý kezindegi ýaqytsha sananyń shatasýy — operasıadan keıingi delırıge baılanysty bolýy múmkin degen boljam bar.
Mash baıandaǵan oqıǵa medısınalyq jarıalanymmen jeke rastalmaǵan. Telegram-arna habarlamalary boıynsha bolǵan jaǵdaıdyń sebebin anyqtaý múmkin emes.
Buǵan deıin Kursiv Health narkozben operasıa kezinde oıanyp ketý múmkindigi týraly jazyp, osyndaı jaǵdaıdy bastan ótkergenin aıtqan adamdardyń áńgimelerimen bólisken.