2026 jyldyń 1 qazanyna deıin qazaqstandyqtar 2025 jylǵy múlik salyǵyn tóleýi tıis. Bul páter, úı, saıajaı, garaj, avtoturaq, sharýashylyq qurylystary men jer telimderiniń ıelerine qatysty. Sonymen qatar, azamattardyń bir bóligi salyqtan tolyq bosatylsa, keıbireýleri jeńildikterdi paıdalana alady, dep habarlaıdy infohub.kz saıty.
Múlik salyǵyn tóleýden jetim balalar men ata-anasynyń qamqorlyǵynsyz qalǵan balalar 18 jasqa tolǵanǵa deıin tolyq bosatylǵan.
Birqatar menshik ıeleri sanattary úshin salyq jeńildikteri qarastyrylǵan. Olar salyqty tolyq joımaıdy, tek salyq esepteletin múlik qunyn tómendetedi. Eger obektiniń quny belgilengen lımıtten aspasa, salyq tóleýdiń qajeti joq. Al eger assa, salyq tek osy shekten asatyn somaǵa ǵana esepteledi.
1 000 AEK (3 932 000 teńge) kólemindegi jeńildik jalǵyz turatyn zeınetkerlerge, «Altyn alqa» ıegerlerine, «Ana dańqy» ordenimen marapattalǵan batyr analarǵa, Keńes Odaǵynyń Batyrlaryna, Sosıalısik Eńbek Erlerine, «Halyq qaharmany» jáne «Qazaqstannyń Eńbek Eri» ataqtarynyń ıegerlerine, «Dańq» ordeniniń tolyq kavalerlerine, «Otan» ordenimen marapattalǵandarǵa beriledi. Eger múliktiń quny 3,932 mln teńgeden aspasa, salyq tóleýdiń qajeti joq.
1 500 AEK (5 898 000 teńge) kólemindegi jeńildik múgedektigi bar adamdarǵa, Uly Otan soǵysynyń ardagerlerine, olarǵa teńestirilgen tulǵalarǵa, sondaı-aq soǵys jyldarynda tyldaǵy adal eńbegi nemese minsiz qyzmeti úshin KSRO ordenderimen jáne medaldarymen marapattalǵandarǵa beriledi. Eger obektiniń quny osy shekten aspasa, salyq salynbaıdy; asqan jaǵdaıda salyq tek asyp ketken somaǵa ǵana esepteledi.
Eger salyq organy jeńildikti esepke almaı salyqty eseptep qoısa, menshik ıesi qaıta esepteý úshin múliktiń ornalasqan jerindegi salyq organyna nemese e-Otinish servısi arqyly júgine alady, onda obektiniń mekenjaıy men jeńildik negizin kórsetýi qajet.
Jeke tulǵalardyń múlik pen jer telimine salyǵyn salyq organdary esepteıdi. Jeke úı ıelerine úı men jerge salyq birden eseptelip, bir tólemmen tóleýge bolady. Esepteý kezinde aýdany, sharshy metrdiń bazalyq quny, aımaq, tozý dárejesi, aımaqtandyrý koefısıenti, obektiniń maqsaty men AEK mólsheri eskeriledi. Naryqtyq qun emes, memlekettik baǵalaý qoldanylady.
2026 jyldan bastap Qazaqstanda quny 450 mln teńgeden asatyn múlikke salyqtyń joǵarylatylǵan mólsherlemesi qoldanylady. Alaıda bıylǵy jyly ol qoldanylmaıdy: 2026 jyldyń 1 qazanyna deıin 2025 jylǵy salyq burynǵy erejeler boıynsha tólenedi. Joǵarylatylǵan mólsherleme alǵash ret 2026 jylǵy salyqty esepteý kezinde qoldanylady (2027 jyldyń 1 qazanyna deıin tólenedi). Quny 450 mln teńgeden asatyn bólikke 2% mólsherleme qoldanylady.