Qazaqstan, Saýd Arabıasy, Reseı, Irak, Kýveıt, Nıgerıa, Aljır jáne Venesýela energetıkalyq ınfraqurylymǵa jasalǵan shabýyldarǵa alańdaýshylyq bildirdi, dep habarlaıdy infohub.kz saıty.
OPEK-te atalǵan elder kiretin Birikken mınıstrlik monıtorıń komıtetiniń 67-shi otyrysynyń qorytyndysy shyǵaryldy. Taraptar álemdik energıa naryqtarynyń turaqtylyǵyn qamtamasyz etý máselelerin talqylady.
Komıtet energıa aǵynynyń úzdiksizdigin kepildendirý úshin halyqaralyq teńiz joldary qaýipsizdiginiń mańyzdylyǵyn erekshe atap ótti. Málimdemede energetıkalyq ınfraqurylymǵa jasalǵan shabýyldarǵa alańdaýshylyq bildirilgeni aıtylady, óıtkeni zaqymdalǵan nysandardy tolyq qýatqa deıin qalpyna keltirý qymbat jáne uzaq proses bolyp tabylady, bul energıamen jabdyqtaýdyń jalpy qoljetimdiligine áser etedi.
Energıamen jabdyqtaý qaýipsizdigine nuqsan keltiretin kez kelgen áreket, ınfraqurylymǵa shabýyl nemese halyqaralyq teńiz joldarynyń buzylýy bolsyn, naryqtyń qubylmalylyǵyn arttyrady jáne óndirýshiler, tutynýshylar men álemdik ekonomıka múddesinde turaqtylyqty qoldaýǵa baǵyttalǵan ujymdyq kúsh-jigerdi álsiretedi.
Eske salaıyq, 30 shildede Kaspı qubyr konsorsıýmynyń (KQK) baspasóz qyzmeti teńiz termınaly akvatorıasynda tankerge jasalǵan shabýyl týraly habarlap, ony terorıstik dep atady. Marshall araldarynyń týy astyndaǵy Niffos Sifnos tankeri zardap shekti, júk jóneltýshi «Teńizshevroıl» JSHS («Shevron» kompanıasy, Qazaqstan) bolyp tabylady. Keme alys ornalasqan bekitý qurylǵysynda munaı tıeý kezinde bolǵan. Keıin energetıka mınıstrligi KQK jumysynyń tolyq toqtatylýy múmkin degen aqparatty joqqa shyǵardy.