Qazaqstan Energetıka mınıstrligi Kaspı qubyr jelisi konsorsıýmy (KQK) arqyly munaı jetkizýdiń ýaqytsha toqtatylýyna túsinik berdi, dep habarlaıdy infohub.kz.
Vedomstvonyń baspasóz qyzmetiniń túsindirýinshe, KQK teńiz termınalynda tıeý operasıalary Qara teńiz akvatorıasynda kemeler, ekıpajdar jáne ekologıa qaýipsizdigin qamtamasyz etý maqsatynda ýaqytsha toqtatyldy. Sonymen qatar konsorsıýmnyń barlyq óndiristik-tehnıkalyq nysandary jaramdy kúıde, shtattyq rejımde jumys istep tur jáne jaǵdaı qalypqa kelgennen keıin shıkizat tasymalyn qaıta bastaýǵa ázir.
«Qubyr júıesine munaı qabyldaýdaǵy shekteýlerge jáne munaı óndirýshi kompanıalardyń rezervýar parkteriniń tolyp ketýine jol bermeý maqsatynda táýliktik óndiris deńgeılerine baqylaýly túzetý júrgizildi, bul munaı óndirý kóleminiń ýaqytsha tómendeýine ákeldi. Bul shara tehnologıalyq sıpatqa ıe jáne óndiristik prosesterdiń turaqtylyǵyn qamtamasyz etýge baǵyttalǵan», — dep atap ótti mınıstrlikte.
Energetıka mınıstrligi KQK basshylyǵymen, iri júk jóneltýshilermen, keme ıelerimen jáne tıisti memlekettik organdarmen úzdiksiz baılanysta ekenin de jetkizdi. «Qazirgi tańda qaýipsiz keme júzý jaǵdaıyn qamtamasyz etý jáne qazaqstandyq munaıdyń álemdik naryqtarǵa turaqty eksportyn tezirek qaıta bastaý úshin sheshimder ázirleý boıynsha úzdiksiz keńes ótkizilip jatyr», — dep naqtylady vedomstvo.