Mýztaý (Belýha) taýynyń etegine jetpek bolǵan qazaqstandyqtar batpaqpen júrýge májbúr. Katon-Qaraǵaı ulttyq parki Reseı Federasıasymen memlekettik shekaraǵa jaqyndyǵyna baılanysty yńǵaılyraq marshrýt salýdy josparlap otyrǵan joq, dep habarlaıdy infohub.kz saıty.
Ulttyq park «Kýrsıvke» túsindirgendeı, onyń aýmaǵynda barlyǵy 14 týrısik marshrýt bar. Al «Aq Berel» soqpaǵy Mýztaý etegine aparatyn eń qysqa jol bolyp qala beredi.
Alaıda taýǵa barar joldyń bir bóligi Reseı aýmaǵymen ótetindikten, týrıser qazaqstandyq jaqta batpaqty ári júrýge qıyn jermen aınalma jol júrýge májbúr. Dál osy aýmaqtyń shekaralyq mártebesine baılanysty ulttyq park jańa marshrýt salýdy josparlamaıdy.
«Iazevoe kólinen Sársembaı shatqalyna deıingi aralyqta balama marshrýt jasaý nusqalary ulttyq park tarapynan qarastyrylmaıdy. Bul jer bederiniń júrýge qıyndyǵymen jáne marshrýttyń qasynan ótetin Reseı Federasıasymen memlekettik shekaranyń jaqyndyǵymen baılanysty», — dedi vedomstvoda.
Buǵan deıin «Kýrsıv» Altaıdaǵy qazaqstan-reseı shekarasyn belgileý jumystaryn 2026 jyldyń sońyna deıin tolyq aıaqtaýdy josparlap otyrǵanyn jazǵan. Qazaqstan Respýblıkasynyń Ulttyq qaýipsizdik komıteti Mýztaý taýynyń basyndaǵy demarkasıanyń qorytyndy kezeńi tanymal týrısik marshrýtqa kirýdi bógemeıtinine sendirdi.