Mysyrdyń Sakkara aımaǵynda arheologtar Jańa patshalyq dáýirine jatatyn úsh jartas beıitin tapty. Bul tabylǵandar ejelgi Mysyrdyń joǵary laýazymdy sheneýnikteriniń ómiri týraly túsinikti edáýir keńeıtýi múmkin, dep habarlaıdy infohub.kz saıty.
Beıitter Býbastıon qorymynan tabyldy. Erekshe qundylyq – saqtalǵan ıeroglıftik mátinder. Olar beıit ıeleri ǵana emes, olardyń otbasy músheleri – áıelderi, analary men balalary týraly da maǵlumat beredi. Zertteýshilerdiń aıtýynsha, mundaı tabylǵandar óte sırek kezdesedi.
Birinshi beıit sheneýnik ári áskerı qolbasshy Mentýhotepke tıesili. Qabyrǵalarynda ań aýlaý, salt-joralǵylar kórinisteri jáne ıesiniń anasy Iahhoteppen birge beınesi saqtalǵan. Bul ejelgi mysyrlyq aqsúıekterdiń otbasylyq dástúrleri týraly maǵlumat beredi.
Ekinshi beıit Samýt degen atpen de belgili Pareemvaııdyń jerlengen orny bolyp shyqty. Ol Ptah hramynda bas saýdager qyzmetin atqarǵan. Arheologtar qabyrǵalardan onyń jubaıynyń, anasynyń jáne tórt balasynyń esimderin tapty. Sarapshylardyń pikirinshe, bul jazýlar Jańa patshalyq dáýirindegi elıta ókilderiniń otbasy qurylymy men kúndelikti ómirin jaqsyraq túsinýge kómektesedi.
Úshinshi beıit Nehsı esimdi úı basqarýshysyna tıesili. Ol basqalaryna qaraǵanda nashar saqtalǵanymen, ishinen ıeroglıftik jazýy bar baǵana synyǵy tabyldy. Jazýda Mysyrdyń áskerı qolbasshysynyń Sırıanyń soltústiginde ornalasqan Naharın elinen oralýy baıandalady.
Mysyrdyń týrızm jáne kóne jádigerler mınıstrliginiń málimetinshe, bul tabylǵan mańyzdy tarıhı baǵdar boldy. Jazý eskertkishtiń Jańa patshalyq kezeńine jatatynyn rastap, ejelgi Mysyrdyń Taıaý Shyǵys memleketterimen tyǵyz baılanysta bolǵanyn kórsetedi.
Býbastıon qorymynda zertteý jumystary jalǵasýda. Kelesi arheologıalyq maýsymda ǵalymdar jerleý shahtalary men kóne keshenniń zerttelmegen bólikterin qazýdy jalǵastyryp, jańa artefaktiler men jerleý oryndaryn tabýdy josparlap otyr.