Qazaqstandaǵy ortasha jalaqy nomınaldy túrde ósip otyr, biraq ınflásıa bul ósimdi tolyǵymen joqqa shyǵaryp, naqty mánde kóptegen mamandardyń aılyǵy qysqardy. BCC Invest sarapshylarynyń dereginshe, 2026 jyldyń birinshi toqsanynda el boıynsha ortasha jalaqy 461,5 myń teńgeni quraǵan, alaıda ınflásıany eskergende ol jyldyq mánde 2,3%-ǵa tómendegen, dep habarlaıdy infohub.kz.
Naqty tabystyń eń aıtarlyqtaı tómendeýi IT sektorynda baıqaldy – 8,0% (ortasha jalaqy – 883 837 teńge). Bilim salasynda quldyraý 6,7% (315 100 teńge), qonaq úı jáne meıramhana bıznesinde 6,4% (365 066 teńge) boldy. Bul salalar baǵanyń basym ósýiniń basty «qurbandary» bolyp otyr.
Sonymen qatar birqatar sektorlar naqty jalaqynyń ósýin kórsetti. Kóshbasshy – aýyl sharýashylyǵy: plús 7,7% (ortasha jalaqy 299 513 teńge). Qarjy sektory 5,7%-ǵa (1 010 271 teńge), sýmen jabdyqtaý 4,3%-ǵa (333 310 teńge), óńdeý ónerkásibi 2,1%-ǵa (291 537 teńge), kólik 1,1%-ǵa (654 342 teńge) ósti.
Óńirler boıynsha naqty jalaqy tek Abaı oblysynda ǵana ósken – jyldyq kórsetkish 2,4%. Sarapshylar sondaı-aq eleýli teńgerimsizdikti atap ótedi: óńirler arasynda eńbekaqy aıyrmashylyǵy eki ese, ekonomıkanyń ártúrli sektorlary arasynda úsh ese, qala men aýyl arasynda shamamen 37% aıyrma bar.
Oń úrdis – resmı jumyspen qamtýdyń ósýi: qazaqstandyqtar eńbek sharttaryn jıi rásimdeı bastady, bul olardyń qarjylyq jáne áleýmettik qorǵalýyn nyǵaıtady. Buǵan deıin sarapshylar joǵary jalaqynyń ózi qorǵaýǵa kepildik bermeıtinin, sondyqtan jınaqtardyń bolýy azamattar úshin óte mańyzdy ekenin atap ótken bolatyn.