Bloomberg agenttigi NATO-nyń joǵary áskerı qolbasshylyǵy Reseı alánstyń shyǵys qanatyna shabýyl jasaǵan jaǵdaıda jyldam jeńiske jetýdiń strategıasyn ázirlep jatqanyn habarlady. Josparda drondar men jasandy ıntellektini biriktirýge erekshe kóńil bólingen, dep jazady infohub.kz saıty.
Basylymnyń málimetinshe, «Jeńis teorıasy» dep atalǵan qujat NATO aýmaǵyna yqtımal basyp kirý kezinde alánstyń qandaı áreketter jasaıtynyn aıqyndaýǵa tıis. Ony Polshada NATO-nyń Eýropadaǵy Birikken qarýly kúshteriniń Joǵarǵy bas qolbasshysy general Aleksýs Grınkevıch tanystyrmaq.
Ahýaldan habardar joǵary laýazymdy sheneýnikter men dıplomattardyń aıtýynsha, bul qujat alánstyń NATO aýmaǵyna yqtımal basyp kirýge qalaı jaýap beretinin naqtylaýy kerek. «Sońǵy ýaqytta Máskeýdiń osyndaı áreketterdi qarastyryp jatqany týraly kóptegen habarlamalar shyqty. NATO Bas hatshysy Mark Rútte jaqynda Reseıdiń alánsqa konvensıalyq shabýylǵa daıyndalyp jatqany týraly eshqandaı belgi joq ekenin, alaıda Eýropa uzaqqa sozylatyn gıbrıdtik shabýyldarǵa daıyn bolýy kerektigin málimdedi», — dep jazady basylym.
Qolbasshylyq ókili polkovnık Martın O’Donnell jospardyń egjeı-tegjeıin talqylaýdan bas tartty, biraq alánstyń «tek qorǵanys sıpatynda» ekenin atap ótti. «NATO-nyń Eýropadaǵy Birikken qarýly kúshteriniń Joǵarǵy bas qolbasshysynyń jeńis tujyrymdamasy qarapaıym: NATO-nyń basymdylyǵyn saqtaý. Jahandyq qaýipsizdik salasyndaǵy turaqsyz ári kúrdeli ahýaldy eskersek, biz agresıany tejeýge jaǵdaı jasap, shabýyl bolǵan jaǵdaıda jeńiske jetýimiz kerek», — dedi O’Donnell.
Qujat sondaı-aq odaqtastarǵa NATO-nyń dástúrli qarý túrlerin Reseıdiń 2022 jyly Ýkraınaǵa tolyqqandy basyp kirýinen keıin paıda bolǵan jańa múmkindiktermen qalaı ushtastyratynyn kórsetýge, sondaı-aq olardy qorǵanysqa ınvestısıany ulǵaıtýǵa jáne daıyndyq deńgeıin arttyrýǵa yntalandyrýǵa tıis, dedi jabyq aqparat bolǵandyqtan atyn jasyrǵan derekkózder.
«NATO-ǵa shabýyl jasalǵan jaǵdaıda aláns qurlyq áskerleri men basqa da kúshter men quraldardy ushtastyra otyryp, arzan drondarǵa, ekıpajy az júıelerge jáne jasandy ıntellekt qoldanylatyn nysanany baǵyttaý tehnologıalaryna súıenetin tujyrymdama aıasynda basyp kirýdi toqtatýdy kózdeıdi. Manevr bostandyǵyn qamtamasyz ete otyryp, aláns qarsylastyń basqarý júıesin joıýǵa umtylyp, reseılik áskerlerge jyldam ári kúırete soqqy bermek», — delingen materıalda.