2026 jyldyń birinshi jartysynda Qazaqstanda 57 jalǵan aqsha belgisi anyqtaldy, onyń 49-y – banknot, 8-i – moneta. Jalpy somasy – 259 400 teńge. Bul 2025 jyldyń sáıkes kezeńimen salystyrǵanda 68,4%-ǵa kem. Bul týraly infohub.kz habarlady.
Ulttyq banktiń derekteri boıynsha, eń kóp qoldan jasalǵan banknottar – 2 myń teńgelik kýpúralar, sany 22 dana (jalpy jalǵan aqshanyń 38,6%-y). Ekinshi orynda – 10 myń teńgelik kýpúralar, 16 dana (28,1%), úshinshi orynda – 5 myń teńgelik kýpúralar, 11 dana (19,3%). Qalǵan 14%-y monetalarǵa tıesili.
Sonymen qatar, retteýshi áleýmettik jeliler men messendjerlerde naǵyz banknottardy ımıtasıalaıtyn polıgrafıalyq ónimderdi satyp alý týraly alaıaqtyq habarlandyrýlar taralyp jatqanyn eskertedi. Mundaı jalǵan aqshalarda «Birge toılaımyz» jáne «Tólem quraly bolyp tabylmaıdy» degen jazýlar bolady. «Osyǵan baılanysty banknottardy paıdalanǵan kezde jazýlarǵa erekshe nazar aýdaryp, olardyń tólnusqalylyǵyn tekserýge keńes beremiz», – delingen Ulttyq bank habarlamasynda.