Almatydaǵy Naýryzbaı aýdanynda áleýmettik ınfraqurylym qarqyndy damyp keledi: turǵyndardy sapaly bilimmen qamtamasyz etý úshin jańa mektepter men balabaqshalar salynýda, dep habarlaıdy infohub.kz.
Naýryzbaı aýdany ákimdigi men Almaty qalalyq komýnıkasıalar qyzmetiniń uıymdastyrýymen ótken pres-týr barysynda jýrnalıserge salynyp jatqan bilim nysandary men paıdalanýǵa berilgen mekemeler kórsetildi. Qarqyndy damyp, jańa ǵımarattar salynyp jatqan aýdan úshin áleýmettik ınfraqurylymdy damytý basym baǵyttardyń biri bolyp qala beredi.
Qazirgi ýaqytta jataqhanasy bar №15 mektep-ınternatynyń qurylysy jalǵasýda. Nysan tolyq daıyn, onyń ashylýy 2026 jyldyń qyrkúıegine josparlanǵan. Sondaı-aq №174 mektep-gımnazıasyna 375 oryndyq qosymsha ǵımarattyń qurylysy aıaqtalýda, ol bıylǵy qyrkúıekte alǵashqy oqýshylaryn qabyldaıdy.
Sonymen qatar mektepke deıingi mekemelerdi salý jobalary júzege asyrylýda. 2026 jyldyń úshinshi toqsanynyń sońyna deıin úsh balabaqshanyń qurylysyn aıaqtaý josparlanǵan: Nurly Dala jáne Qýramys shaǵyn aýdandarynda 320 oryndyq eki nysan, sondaı-aq Qalqaman shaǵyn aýdanynda 240 oryndyq balabaqsha.
Aýdannyń bilim mekemeleri jelisi jańa nysandarmen tolyqty. Paıdalanýǵa bes mektep berildi: Alem City turǵyn úı kesheniniń janyndaǵy 1200 oryndyq №41 mektep, «Nurly Dala» turǵyn úı keshenindegi 1500 oryndyq №214 mektep, Sabdenov kóshesindegi 2500 oryndyq №221 mektep, Qýramys shaǵyn aýdanyndaǵy 1500 oryndyq №219 mektep jáne «Alma Sıtı-3» turǵyn úı keshenindegi 1200 oryndyq №223 mektep. Sonymen qatar, Shuǵyla shaǵyn aýdanynda 320 balaǵa arnalǵan №202 balabaqsha jumysyn bastady.
Naýryzbaı aýdanynyń ákimi Nazıra Toǵyzbaevanyń aıtýynsha, áleýmettik ınfraqurylymdy damytý Almatynyń eń qarqyndy damyp kele jatqan aýdandarynyń birindegi jumystyń negizgi baǵyttarynyń biri bolyp qala beredi. Jańa mektepter men balabaqshalardyń salynýy oqýshy oryndarynyń tapshylyǵyn azaıtýǵa, jańa shaǵyn aýdandardyń turǵyndaryna bilimdi qoljetimdi etýge jáne balalardyń oqýy men tárbıesi úshin qolaıly jaǵdaı jasaýǵa múmkindik beredi.