2026 jyldyń 31 shildesinen bastap Qazaqstanda Eýrazıalyq ekonomıkalyq odaq (EAEO) aýmaǵy arqyly taýar tasymaldaý kezinde navıgasıalyq plombalardy qoldaný keńeıtiledi. Jańa erejeler halyqaralyq júk tasymalyna qatysýshylarǵa qatysty bolady, dep habarlaıdy infohub.kz saıty.
QR Qarjy mınıstrliginiń Memlekettik kirister komıteti navıgasıalyq plombanyń kólikke ornatylatyn jáne júk qozǵalysyn naqty ýaqyt rejıminde baqylaýǵa múmkindik beretin elektrondyq qurylǵy ekenin eske saldy.
Osy kúnnen bastap plombalar kedendik tranzıt rásimi boıynsha ótetin barlyq taýarlardy avtomobılmen tasymaldaý kezinde mindetti bolady. Erekshelik – EEK Keńesiniń sheshiminde kózdelgen jekelegen júk sanattary.
«Sondaı-aq jańa talaptar аlkogól, temeki ónimderi, sanksıalyq taýarlar, meh buıymdary, aıaq kıim, kıim jáne elektronıkany temirjolmen tasymaldaýǵa da qatysty bolady», – dep naqtylady vedomstvodan.
Navıgasıalyq plombalardy engizýdiń birinshi kezeńi EAEO-da 2026 jyldyń 11 aqpanynda bastalyp, odaqtyń eki nemese odan da kóp elderiniń aýmaǵy arqyly halyqaralyq tasymaldarǵa qatysty boldy.
QR Memlekettik kirister komıteti júıe tasymaldaý qaýipsizdigin arttyrýǵa, júk qozǵalysyn ashyq etýge jáne qosymsha tekserýlerdi azaıtýǵa kómektesetinin atap ótti.
Tasymaldaýshylarǵa, eksporttaýshylar men ımporttaýshylarǵa shekarada kidiristerdi boldyrmaý úshin jetkizilimderdi josparlaý kezinde jańa talaptardy aldyn ala eskerý usynylady.
Buǵan deıin «Nur joly» keden beketiniń basshysy Murat Erdenbekov beket 2025 jyly pılottyq jobadan ótkenin aıtqan bolatyn. 544 kólikke 1 075-ten astam plomba ilinip, barlyq prosester jetildirildi jáne baqylaýdan ótýdi baıaýlatpaıdy.