Qazaqstannyń tuńǵysh prezıdenti Nursultan Nazarbaev Kaspı teńizindegi oqý-jattyǵý kezinde qazaqstandyq áskerı qyzmetshilerdiń qaza tabýyna baılanysty kóńil aıtty. Bul týraly eks-prezıdenttiń resmı saıtynda jazylǵan, dep habarlaıdy infohub.kz saıty.
Kóńil aıtý habarlamasynda Nazarbaev Mańǵystaý oblysyndaǵy áskerı oqý-jattyǵý barysynda Qarýly Kúshter áskerı qyzmetshileriniń qaza tapqany týraly qaıǵyly habardy tereń qaıǵyra qabyldaǵany atap ótilgen.
«Orny tolmas qazanyń ashysyn bólise otyryp, tuńǵysh prezıdent qaza tapqandardyń týǵan-týystary men jaqyndaryna shyn júrekten kóńil aıtty», — delingen habarlamada.
24 qyrkúıek kúni tústen keıin Áskerı-teńiz kúshteri Kaspı teńiziniń jaǵalaýynda oqý-jaýyngerlik mindetti oryndap jatty. Aýa raıy kúrt nasharlap, jel kúsheıdi, nátıjesinde 17 áskerı qyzmetshi ashyq teńizge aǵyzylyp ketti.
Qorǵanys mınıstrliginiń dereginshe, 12 adam qaza tapty. Úsheýin qutqaryp qalý múmkin boldy, olardyń bireýi aýrýhanaǵa tústi. Taǵy eki sarbazdy izdeý jalǵasýda.
Qaıǵyly oqıǵanyń sebepterin tergeý jónindegi úkimettik komısıany Qanat Bozymbaev basqardy. Áskerılerdiń qaza tabýyna qatysty qylmystyq is qozǵaldy. Bas prokýratýra tergeýdi erekshe baqylaýǵa aldy.
Keıin prezıdent Qasym-Jomart Toqaev 25 qyrkúıekti qaza tapqan áskerı qyzmetshilerdi eske alý kúni dep jarıalady.
Buǵan deıin «Kýrsıv» sarbazdardyń qaza tabýyna qatysty Qazaqstan Respýblıkasy Qylmystyq kodeksiniń 453-babynyń 2-bóligi («Qyzmetke nemquraıly qaraý, aýyr zardaptarǵa ákep soqqan») jáne 465-baby («Keme júrgizý erejelerin buzý») boıynsha qylmystyq is qozǵalǵanyn jazǵan.