Óskemendegi ónerkásiptik armatýra zaýytynyń dırektory Erjan Áshimov ótken jyly 19,3 mln teńge syıaqy alǵanyn infohub.kz saıty habarlaıdy.
Bul soma onyń aldyńǵy jylǵy tabysynan (19,8 mln teńge) sál az. Top-menedjerdiń ortasha aılyq tólemi 1,6 mln teńgeni quraǵan, bul ótken jyldardaǵy deńgeıge sáıkes keledi.
Aıta keterligi, kásiporynnyń ózi 2025 jyldy 522 mln teńge shyǵynmen aıaqtasa, bir jyl buryn 1,9 mlrd teńge paıda tapqan edi.
Munaı jáne gaz qubyrlaryna arnalǵan qubyr armatýrasyn, sondaı-aq munaı jáne gaz ken oryndaryna arnalǵan jabdyqtardy shyǵaratyn zaýyt Dárıǵa Nazarbaevanyń týysy Sergeı Chaıjýnýsovtyń jubaıy Gúlnara Chaıjýnýsovaǵa tıesili.
Kompanıa aksıalarynyń 80 paıyzy Gúlnara Chaıjýnýsova baqylaıtyn «Mısar 2013» kompanıasynda. Qalǵan úlester Valentına Sım men Dınara Áshimova arasynda bólingen — árqaısysynda 10 paıyzdan.
Sergeı Chaıjýnýsov sonymen qatar tústi metalýrgıa kásiporyndaryn jobalaý boıynsha jetekshi kompanıa «Qazgıprosvetmettiń» quryltaıshysy jáne birqatar taý-ken óndirý, saýda jáne aýyl sharýashylyǵy kásiporyndarynyń ıesi.
Aıta ketý kerek, 2018 jyly Dárıǵa Nazarbaevanyń qyzy Venera Sergeı Chaıjýnýsovtyń inisi Dalen Chaıjýnýsovqa turmysqa shyqqan.