Nazarbayev University Times Higher Education (THE) World University Rankings reıtıńinde ekinshi jyl qatarynan óz ornyn jaqsartyp, birden 100 satyǵa kóterildi, al eki jylda 200 pozısıaǵa ósti, dep habarlaıdy infohub.kz saıty.
2024 jyly ýnıversıtet 501–600 dıapazonynda bolsa, kelesi reıtıńtik sıklde 401–500-ge kóterildi, al aǵymdaǵy reıtıńte 376–400 tobyna endi. Sonymen qatar, NU Qazaqstan men Ortalyq Azıanyń JOO arasynda birinshi oryndy saqtap qaldy.
THE World University Rankings álemdegi eń bedeldi ýnıversıtet reıtıńteriniń biri sanalady. Bıyl oǵan 118 el men aımaqtan rekordtyq 2 297 ýnıversıtet endi — byltyrǵydan 106-ǵa artyq. Halyqaralyq báseke kúsheıip jatqanda NU eki jylda álemniń top-23%-nan top-17% ýnıversıtetteriniń qataryna kóterildi.
THE ýnıversıtetterdi bes baǵyt boıynsha baǵalaıdy: bilim sapasy, zertteý ortasy, zertteý sapasy, halyqaralyq ashyqtyq jáne ındýstrıamen ózara árekettestik. Jańa reıtıńte NU barlyq derlik baǵyttar boıynsha nátıjesin jaqsartty. Eń kúshti kórsetkish — zertteý sapasy. Bul turǵyda NU-dyń nátıjesi University of Geneva, University of Arizona jáne University of Rochester-pen salystyrýǵa turarlyq, bul ýnıversıtet zertteýleriniń yqpaly artyp kele jatqanyn kórsetedi.
«Eń aldymen NU qaýymdastyǵyn jáne Qazaqstandy osy nátıjemen quttyqtaǵym keledi. Tuńǵysh ret qazaqstandyq ýnıversıtet álemniń jetekshi ýnıversıtet reıtıńteriniń birinde osyndaı deńgeıge jetti. Bul — tek bizdiń ýnıversıtet úshin ǵana emes, eldiń joǵary bilim júıesi úshin de mańyzdy jetistik. Bul nátıjeniń artynda NU oqytýshylarynyń, zertteýshileriniń, stýdentteri men qyzmetkerleriniń kópjyldyq eńbegi tur. Ýnıversıtettiń, ǵylym men bilimniń damýyna óz eńbegimen úles qosyp júrgen árkimge alǵys aıtamyn», — dedi NU prezıdenti Vakar Ahmad.
NU-da oqýǵa degen qyzyǵýshylyq ta artyp keledi. Bıyl oqýǵa shamamen 12 myń adam tapsyrdy, al sheteldik stýdentterdi qabyldaý ýnıversıtet tarıhyndaǵy eń joǵary kórsetkishke jetti. Túlekterdiń jumysqa ornalasý deńgeıi joǵary — 95%-dan astam.
Bul nátıjeler NU-dyń akademıalyq bedeliniń nyǵaıyp, Qazaqstanda jáne odan tys jerlerde ýnıversıtetke degen senimniń artqanyn kórsetedi. Halyqaralyq reıtıńterdegi ósim ýnıversıtettiń turaqty damýyn jáne jahandyq akademıalyq qaýymdastyqtaǵy róliniń artyp kele jatqanyn rastaıdy.
Aǵymdaǵy reıtıńte Qazaqstan on ýnıversıtetpen usynylǵan. Olardyń qatarynda S.J. Asfendıarov atyndaǵy Qazaq ulttyq medısına ýnıversıteti (1201–1400), ál-Farabı atyndaǵy Qazaq ulttyq ýnıversıteti (1401–1600), Q.I. Sátbaev atyndaǵy Qazaq ulttyq tehnıkalyq zertteý ýnıversıteti (1401–1600), L.N. Gýmılev atyndaǵy Eýrazıa ulttyq ýnıversıteti (1601–1800) bar.