Nepalǵa apta basynda eldiń shekaralas aýdandaryn sharpyǵan apatty sý tasqynynan keıin qalpyna keltirýge 4-5 mıllıard dollar qajet bolady. Bul týraly Nepaldyń qarjy mınıstri Svarnım Vagle Reuters agenttigine bergen suhbatynda málimdedi. Onyń aıtýynsha, bul soma ázirge aldyn ala — bılik shyǵyn men qıraý kólemin baǵalaýdy jalǵastyrýda, dep habarlaıdy infohub.kz saıty.
Nepaldyń syrtqy ister mınıstri Shıshır Khanaldyń aıtýynsha, elge jergilikti mamandardyń tájirıbesi jetkiliksiz bolatyn arnaıy jáne tehnıkalyq salalarda sheteldik kómek qajet. Atap aıtqanda, bul týnelderden adamdardy qutqarý, kópirler qıraǵan aýdandarda kólik jáne baılanys júıesin qalpyna keltirý, qaza tapqandardy anyqtaý, DNK-test júrgizý jáne máıitterdi uzaq ýaqyt saqtaý máseleleri. «Biz tájirıbe men tehnıkalyq bilim jetispeıtin salalarda osyndaı arnaıy qyzmetter men tehnıkalyq kómek suradyq», — dedi Khanal.
Sonymen qatar, Nepal qarapaıym izdeý-qutqarý jumystaryna sheteldik komandalardy tartýdy qajet dep sanamaıdy. Mınıstrdiń aıtýynsha, bul mindetti jergilikti qutqarýshylar atqarady. Úndistan men Qytaı elge ýaqytsha Bailey Bridge kópirlerin berýi tıis, bul kólik jáne baılanys júıesin qalpyna keltirýge múmkindik beredi. Zardap shekken aýdanda jıyrmaǵa jýyq kópir qıraǵan.
Tabıǵı apat sársenbide Gımalaıdaǵy muzdyqtyń qulaýynan bastaldy. Taý ózenderiniń boıymen tas, muz, laı jáne qoqystyń alyp aǵyny ótti. 26 tamyzda Nepal men Qytaı shekarasyna jaqyn ornalasqan Rasýva bıik taýly aýdanynda sý, laı jáne tas aǵyndary úılerdi, joldardy, kópirlerdi, avtomobılderdi, gıdroenergetıka nysandaryn, mektepter men aýrýhanalardy shaıyp ketti.
Nepal men Qytaıdyń Tıbetindegi sý tasqyny saldarynan 600-den astam adam qaza tapty, taǵy 2 myńnan astam adam habar-osharsyz ketti. Bılik jańa máıitterdiń tabylýy múmkin ekenin eskertedi. Khanaldyń aıtýynsha, aýrýhanalar qaza tapqandarǵa tolyp, olardy saqtaýǵa arnalǵan tońazytqysh jabdyqtar jetispeıdi.
Bolashaqta Nepalǵa qıraǵan ınfraqurylymdy qalpyna keltirý jáne zardap shekken aýdandardy ońaltý úshin halyqaralyq qoldaý qajet bolady. Aldyńǵy kúni Qazaqstannyń Syrtqy ister mınıstrligi Nepal men Qytaı shekarasyndaǵy apat aımaǵynan elimizdiń úsh azamatshasyn izdeý júrip jatqanyn habarlady.