Nepaldaǵy joıqyn sý tasqynynan keıin qutqarýshylar senbi kúni taǵy eki adamdy tirideı tapty. Bul týraly infohub.kz saıty habarlaıdy.
Qytaılyq er adam men nepaldyq áıel eki bólek operasıa barysynda aman alyndy. Bılik 10 kún buryn bolǵan sý tasqynynan keıin myńdaǵan adamdy izdeýdi jalǵastyrýda.
Nepal áskeriniń málimetinshe, armıa men Ońtústik Koreıanyń tótenshe jaǵdaı mamandarynan quralǵan birlesken top joǵarǵy Trıshýlı-1 gıdroenergetıkalyq jobasyndaǵy 225 metrlik týnelden er adamdy qutqarǵan. Ol qazir medısınalyq tekserýden ótýde. Onyń týnelden shyǵarylǵan sáti túsirilgen sýretterde kórinedi, keıin ony tikushaqpen evakýasıalaǵan.
Qutqarý jumystary Nepaldaǵy ondaǵan gıdroenergetıkalyq jobalarǵa baǵyttalǵan. Onda 900-ge jýyq jumysshy habarsyz ketken, olardyń 500-i úlken týnelderde qamalyp qalǵan bolýy múmkin. Úndistan, Qytaı, Ońtústik Koreıa jáne AQSH-tyń halyqaralyq qutqarý toptary qıraǵan qurylystar men týnelderdi aralap, tiri qalǵandardy izdeýde.
Buǵan deıin juma kúni Trıshýlı ózenindegi gıdrostansıanyń taǵy bir týnnelinen eki nepaldyq jumysshy qutqarylǵan bolatyn. Sarapshylardyń aıtýynsha, ýaqyt ótken saıyn týnelderde tiri adamdardy tabý múmkindigi azaıýda.
64 jastaǵy nepaldyq áıel Nývakot qalasyndaǵy qıraǵan úıden aman alyndy. Nepal áskeri jarıalaǵan fotosýretterde qutqarýshylardyń áıeldi laı ishinen taýyp, qaýipsiz jerge shyǵaryp, emdelý úshin Katmandýǵa áýe arqyly jetkizgeni kórsetilgen. Ony úıden shyǵarǵan kezde Nepal polısıasynyń qyzmetkerleri qýanyshpen aıǵaılaǵan. Úıdiń tómengi bóligi qalyń laıǵa batqan edi.
Eske salaıyq, 26 tamyzdaǵy muzdyq pen jartastyń opyrylýynan týyndaǵan sý tasqynynan zardap shekkenderdi izdeý jumystary jalǵasýda. Tasqyn ınfraqurylymǵa orasan zor shyǵyn keltirdi: 40-tan astam kópir qulap, ózenderdiń deńgeıi kútpegen jerden kóterildi. Nepaldyń tótenshe jaǵdaılar jónindegi agenttiginiń málimetinshe, sý tasqynynan keminde 1375 adam qaza taýyp, 5 myńnan astam adam habarsyz ketken.